Qazaqstanda polsha almasy ósiriledi
ASTANA. QazAqparat - Qazaqstanda polsha almasyn ósirýge qolaıly óńirler zertteldi. Bul týraly Astanada ótken baspasóz máslıhatynda Qazaqstannyń Polshadaǵy Tótenshe jáne Ókiletti Elshisi Marǵulan Baımuhan málim etti, dep habarlaıdy QazAqparat.
«Polsha alma ósirýden álemde úshinshi orynda, ıaǵnı Qytaı men AQSh-tan keıingi orynda tur. Qazaqstan naryǵynda Polsha almasynyń paıda bolýy - bul naryqtyń qajettigimen, tutynýshynyń suranysymen baılanysty. Alma eksporttaý quqyǵyna ıe kompanııalar bizdiń eldi ózderi tańdady, bul óz kezeginde naryqtyq rejim. Al endi elshilik retinde bizdiń jumysqa toqtalsaq, almany syrttan tasymaldamaı, osy ónimdi elimizde ósirýge ekpin qoıyp otyrmyz. Atap aıtqanda, polshalyq alma kóshetterin Qazaqstanda ósirý baǵytynda jumystardy uıymdastyrý úshin sharalardy atqarýdamyz. Bul protsess bastaldy», - dedi Marǵulan Baımuhan.
Onyń sózine qaraǵanda, keıbir kompanııalar kóshetterdi ósirý jumystaryn Qazaqstan aýmaǵynda bastady. Polshalyq agronomdardyń aqparatyna súıensek, alma ósirý úshin Almaty, Jambyl jáne Ońtústik Qazaqstan oblystary qolaıly.
Aıta keteıik, qazaqstan-polsha taýar aınalymy 2018 jyldyń qańtar-naýryzynda 459,9 mln eýrony qurady. Ótken jyldyń osy kezeńinde bul kórsetkish 280,7 mln eýro somasynda bolǵan edi.
