Qazaqstanda PokemonGO-ǵa uqsas oıyn shyqty
ASTANA. QazAqparat - Astanada EKSPO kórmesi qarsańynda PokemonGO-ǵa uqsas «Qala buryshtary» atty kvest-oıynnyń tanystyrylymy ótti.
Oıyn jelisi 2017 jylǵy EKSPO kórmesiniń «Bolashaq energııalary» taqyrybymen baılanysty. Oıyndy EKSPO aıasynda jastardyń ekologııaǵa qatysty taqyrypqa qyzyǵýshylyǵyn oıatý maqsatyndaǵy ınnovatsııalyq joba retinde tanystyrýǵa bolady, deıdi oıyndy jasaýshylar.
Kvest oıyn boıynsha, oıynshylar qalanyń ár buryshynda ornalasqan energııa bólshekterin GPS arqyly izdep tabýy tıis. Bes túrli energııa bólshekterin alý úshin túrli tapsyrmalar oryndaý shart. Al jınalǵan bólshekterdi oıynshylar vırtýaldy ózenge qosýy tıis.
Mobıldi qosymsha Gete ınstıtýtymen, «Astana EKSPO-2017» Ulttyq kompanııasy men Astana ákimdiginiń qoldaýymen jasaldy. Oıyndy 30 qyrkúıekte nemis, aǵylshyn, qazaq jáne orys tilderinde Google Play jáne App Store mobıldi dúkenderinen tegin júktep alýǵa bolady.
Qazirgi ýaqytta oıyn synaqtan ótip te úlgergen.
«Belgilengen oryndy izdeýdiń ózi oıynshyny eliktirip áketedi. Tapsyrmalardy oryndaý barysynda jınaqtalǵan energııa bólshekterin oıynshy ózendi toltyra alady. Qaraýyldar árbir energııa úshin upaı alady. Osy upaılardyń nátıjesinde eń úzdik oıynshylar anyqtalady. Oıyn barysynda túrli tapsyrmalar beriledi, mysaly, bir zatty qurastyrý, sýret salý, birnárseni taýyp, fotoǵa túsirý jáne jumbaqty nemese shıfrdi sheshý», - deıdi strategııalyq oıyndy synaqtan ótkizgen oıynshy Anastasııa Rımmer.
Onyń aıtýynsha, atalmysh tapsyrmalardy oryndaý barysynda, oıyn ekologııaǵa qatysty túrli ıdeıalardy oılap tabýǵa septigin tıgizedi.
«Qalanyń taza ári tıimdi damýyna qajetti oılar men pikirler týyp jatady. Jańa bir úrdisti engizý boıynsha jańa ıdeıalardy engizýge bolady. Bul tipti noý-haý. Sebebi qala damýyna qatysty oılar men ıdeıalar áleýmettik jelilerde jarııalanady. Eger ákimdik qyzmetkerleri osy paraqshalardy qaraıtyn bolsa, olarda jańa jobalarǵa qyrýar ıdeıalar paıda bolar edi», - dedi ol oıynnyń tanystyrylymynda.
Sonmen qatar bul qosymsha men úshin shetel tilderin oqýǵa, ony tájirıbede qoldanýǵa múmkindik beredi. «Sonyń ishinde men ózimniń qazaq jáne nemis tilderi bilimin jetildirýge kúsh saldym. Sondaı-aq oıynshy qala boıynsha tegin kvestke qatysýǵa múmkindik alady. Oıyn arqyly ózińniń bos ýaqytyńdy qyzyqty ótkizýge, qalanyń sen bilmegen jerlerin aralaýǵa bolady. Qalada saıabaqtar óte kóp, alaıda elordanyń basqa bóliginde turǵandyqtan, olardyń barlyǵynda bolyp kórmegenbiz», - dedi A.Rımmer.
Onyń aıtýynsha, bul oıynda mektep oqýshylary úshin ekologııalyq máselelerdi oqytýǵa taptyrmas qural bola alady. Sonymen qatar stýdentterge de til damytýǵa paıdalanýǵa bolady.
Aıta keteıik, 6 shildede kalıfornııalyq Niantic Labs kompanııasy iOS jáne Android PokemonGo onlaın oıynyn shyǵardy. Kóptegen elderde áli de resmı jarııalanaǵanyna qaramastan ol 2016 jyldyń basty trendine aınalyp úlgerdi. Qazirgi ýaqytta áıgili franshıza motıvimen jasalǵan oıynnyń qurastyrýshylaryna kúnine 1,6 mıllıon dollar tabys taýyp otyr.
