Qazaqstanda pishini sopaq tıyndar aınalysqa shyqty
«Altyn dán dalasy» monetasynyń bet jaǵynda (aversinde) memlekettik tildegi «QAZAQSTAN RESPÝBLIKASY» degen jazbanyń qorshaýynda Qazaqstan Respýblıkasynyń Eltańbasy, moneta daıyndalǵan metaldy, onyń synamasy men salmaǵyn bildiretin «Ag 925 31,1 g» jazýy jáne orys tilinde «RESPÝBLIKA KAZAHSTAN» jazýy bar. Tómengi bóliginde shaqanyń nomınalyn bildiretin «500 TEŃGE» degen jazba ornalasqan. Aınaldyra ulttyq oıý-órnek beınelengen.
Monetanyń syrt jaǵynda (reversinde) kishipeıildilik pen qonaqjaılylyq nyshany retinde stıldendirilgen dalanyń aıasynda qolyna taba nan ustaǵan, ulttyq kıimdegi boıjetken beınelengen. Sol jaq bóliginde «ALTYN DÁN DALASY» jazýy bar kúnniń beınesi jáne soǵylǵan jylyn bildiretin «2017» tańbasy ornalasqan. Oń jaǵynda altyn tústi bıdaı masaǵy jáne Qazaqstan teńge saraıynyń taýar belgisi kórsetilgen.
Shaqanyń eki jaǵyndaǵy beıneler men jazýlar bederli, aınaldyra shyǵyńqy jıek júrgizilgen. 925 synamaly kúmisten jasalǵan, salmaǵy - 31,1 gramm, dıametri - 38,61 mm, daıyndaý sapasy - «proof», taralymy - 3 myń dana.
«Greıg qyzǵaldaǵy» monetasynyń pishini sopaq. Bet jaǵynda (aversinde) Jer ǵalamsharyn meken etetin adamdarǵa oǵan uqypty qaraý qajettigin bildiretin alaqannyń stıldendirilgen beınesi, monetanyń nomınalyn bildiretin «500 TEŃGE» jazýy, moneta daıyndalǵan metaldy, onyń synamasy men salmaǵyn kórsetetin «Ag 925 24 g» jazýy bar. Joǵary bóliginde Qazaqstan Respýblıkasy Ulttyq bankiniń logotıpi ornalasqan. Monetany aınaldyra eki tilde «QAZAQSTAN ULTTYQ BANKІ» jáne «NATIONAL BANK OF KAZAKHSTAN» dep jazylǵan.
Monetanyń reversinde Greıg qyzǵaldaǵynyń túrli-tústi beınesi ornalasqan. Monetany aınaldyra «GREIG QYZǴALDAǴY» jáne gúldiń latyn tilindegi zoologııalyq ataýy «TULIPA GREIGII» degen jazý bar. Soǵylǵan jylyn bildiretin «2017» sany tańbalanǵan.
Shaqanyń eki jaǵyndaǵy beıneler men jazbalar bederlengen, aınaldyra shyǵyńqy jıek júrgizilgen. 925 synamaly kúmisten jasalǵan, salmaǵy - 24 gramm, sopaqsha 38,61 h 28,81 mm, daıyndaý sapasy - «proof», taralymy - 3 myń dana.
Eskertkish monetalardy «QR Ulttyq Bankiniń Qazaqstan teńge saraıy» sharýashylyq júrgizý quqyǵyndaǵy respýblıkalyq memlekettik kásiporny daıyndady.
Nomınaly 500 teńgelik monetalar Qazaqstan Respýblıkasynyń búkil aýmaǵynda kórsetilgen qunymen tólemniń barlyq túrleri boıynsha, sondaı-aq shottarǵa, salymdarǵa, akkredıtıvterge esepteý úshin jáne aýdarym jasaý úshin qabyldanýǵa mindetti, Qazaqstan Respýblıkasynyń barlyq bankterinde shekteýsiz usaqtalady jáne aıyrbastalady.
Olardy Qazaqstan Respýblıkasy Ulttyq Bankiniń barlyq fılıaldarynda, sondaı-aq «Monetalardyń Internet-dúkeni» www.nationalbank.kz QRUB saıtynyń ınternet-dúkeni arqyly satyp alýǵa bolady.