Qazaqstanda pıramıda uıymdastyrǵan azamat qaza tapqan qyrǵyzstandyqtyń tólqujatymen júrgen
ASTANA. KAZINORM – Qarjy pıramıdasyn uıymdastyrý kúdigine ilikken otandasymyz Bishkekte qaza tapqan qyrǵyz azamatynyń tólqujatymen júrgen. Bul týraly 24.kg agenttigi jazdy.
Aqparat agenttiginiń málimetinshe, ótken jyldyń 30 jeltoqsanynda Bishkek qalasynda Qazaqstan Respýblıkasy Qylmystyq kodeksiniń 217-babymen aıyptalyp, izdeýde júrgen 1985 jylǵy O.A. degen shetel azamaty ustalǵan. OL 2000 jyly dúnıeden ótken Qyrǵyz Respýblıkasy azamatynyń tólqujatyn zańsyz alyp, ony birneshe márte qoldanǵan.
«Ol Qazaqstannyń quqyq qorǵaý organdarynan jasyrynyp, Qyrǵyz Respýblıkasynyń memlekettik shekarasyn kesip ótken. Al tirkeý organynyń laýazymdy tulǵasy oǵan resýpblıkada munan ary zańdy júrýi úshin járdem bergen. Buǵan qosa, ol esirtki zatyn saqtaǵany úshin qylmystyq jaýapkershilikke tartylyp, 150 myń som aıyppul tólegen», - dep jazady aqparat agenttigi.
Qazaqstan azamatyna qyrǵyz tólqujatyn zańsyz berý kúdigimen Bishkek qalasy Okıabr aýdandyq tólqujat-vıza jáne tirkeý jumysy bóligiminiń jetekshi mamany 1981 jyly dúnıege kelgen K.A. ustalyp, qamaýǵa alynǵan.
Buǵan deıin 2023 jyldyń jeltoqsan aıynyń sońynda Bishkek qalasynyń baqylaý kameralary Almaty qalasy Medeý aýdandyq polıtsııa basqarmasy QR QK 217-baby «Qarjylyq pıramıdany qurý jáne oǵan basshylyq etý» boıynsha izdeý jarııalaǵan O.A. esimdi Qazaqstan azamatyn anyqtaǵan, ol qolǵa túskenin jazǵan edik.
Aıta keteıik, 2021 jyly sáýir aıynda Qazaqstanda salymshylar úsh kompanııanyń qyzmetine qatysty ujymdyq aryz jazyp, olardy qarjy pıramıdasy dep atady. Bul kompanııalar ózin ınvestıtsııa salasyndaǵy tabysty uıymdar dep tanystyrǵan. Ol paıdaly ınvestıtsııalardy usynatyn osy «joba» kóshbasshylaryn ustaı bastaǵan kezde, jasyrynyp úlgergen.
Kompanııalar salymshylardyń birneshe mıllıard teńgesin zańsyz alǵan. Qarjy aǵynyn arttyrý maqsatynda qarjy pıramıdalary qyzmetine tanymal blogerlerdi de tartqan. Sot qarjy pıramıdasyna qatysy bar eki vaınerdi 5 jyl bas bostandyǵynan aıyrǵan bolatyn.
