Qazaqstanda Pinduoduo-men jańa joba qazan aıynda iske qosylady
ASTANA. KAZINFORM — Qasym-Jomart Toqaev YTO Express atqarýshy dırektory Chjoý Tszıan men Pinduoduo kompanııasynyń halyqaralyq bıznes jónindegi jetekshisi Ven Peıchendi qabyldady, dep habarlaıdy Aqordanyń baspasóz qyzmeti.
Áńgimelesý barysynda logıstıka jáne elektrondy kommertsııa salasynda, sonyń ishinde «Bir beldeý, bir jol» bastamasyn iske asyrý aıasynda ózara tıimdi yntymaqtastyq qurýǵa múmkindik mol ekeni atap ótildi.
Prezıdenttiń aıtýynsha, elimiz 2030 jylǵa qaraı jalpy saýdadaǵy elektrondy kommertsııanyń úlesin 20 paıyzǵa deıin jetkizýdi kózdep otyr.
Memleket basshysy bul rette qytaılyq seriktestermen birlese atalǵan mindetti merziminen buryn oryndaýǵa bolady dep sanaıdy.
Kezdesýde Almaty SkyHub kólik-logıstıka habyn qurý jobasyna aıryqsha mán berildi. Maqsat – Eýropalyq odaq, EAEO jáne Ortalyq Azııa elderine shyǵatyn taýarlardy jedel rásimdeý. Osy bastama Qazaqstannyń ońtústik óńirinde kólik-logıstıka salasynyń damýyna tyń serpin bermek.
Memleket basshysy ıntellektýaldy IT-sheshimderdi keńinen qoldanatyn ári logıstıka úderisin avtomattandyrǵan Qazpost-YTO birlesken kásipornynyń jumysyn oń baǵalady. Búginge deıin YTO Express pen «Qazposhta» qurǵan kásiporyn 12,5 mıllıon sálemdeme jóneltken.
Chjoý Tszıan iri jobalardy júzege asyrýǵa qoldaý kórsetkeni úshin Qasym-Jomart Toqaevqa alǵys aıtty.
YTO Express atqarýshy dırektory Qazaqstan Prezıdentine kompanııanyń tıimdi jetkizý tizbegin jolǵa qoıý, sondaı-aq logıstıka úderisin tsıfrlandyrý tájirıbesi týraly málimet berdi.
Kezdesý barysynda Ven Peıchen bıyl qazan aıynda Qazaqstanda Pinduoduo kompanııasymen birlesken jobanyń iske qosylatynyn aıtty.
Buǵan deıin Prezıdent Fufeng Group kompanııasy dırektorlar keńesiniń tóraǵasy Lı Sıýechýndi qabyldaǵanyn jazǵanbyz.
