Qazaqstanda PIK pen MIB-tiń aı saıynǵy esepti usyný merzimderi ózgertildi

ASTANA. KAZINFORM — Barlyq nysan men basqarý sýbektileri aı saıynǵy esepti múlik ıelerine usynýǵa mindetti, dep habarlaıdy Almaty oblysynyń ákimdigi.

— Aı saıynǵy esepter bekitilgen eseptilik nysanyna sáıkes daıyndalyp, jalpyǵa qoljetimdi jerde ornalastyrylýy, sondaı-aq aqparattyq júıe arqyly jarııalanyp, ashyq sıpatta bolýy tıis. Esepter úı keńesimen kelisilip, bekitilýi jáne MIB tóraǵalary nemese basqarý sýbektisi qol qoıýy qajet. 15 qyrkúıekten keıin aı saıynǵy esepti usyný merzimi esepti kezeńnen keıingi aıdyń 20-shy kúnine deıingi ýaqyt bolyp belgilendi, — delingen habarlamada.

Sonymen qatar, Zańda kondomınıým nysanyn basqarý boıynsha jyldyq esepti usyný tártibi de bekitildi. Jyldyq esepter úı keńesinde qaralyp, múlik ıeleriniń jalpy jınalysynda talqylanyp, esepti kezeńnen keıingi jyldyń 1 sáýirge deıin qabyldanýy tıis.

Qosymsha retinde, múlik ıeleri esepke qosa bank shotyndaǵy qarajat qozǵalysy týraly úzindi kóshirmelerdi, aqaý aktilerin, montajdaý jáne oryndalǵan jumystar aktilerin, sondaı-aq qarajattyń jumsalýyn rastaıtyn basqa da qujattardy suratýǵa tolyq quqyǵy bar.

Árbir páterdiń, turǵyn emes úı-jaıdyń, avtoturaq ornynyń nemese qoımanyń menshik ıesi aǵymdaǵy, jınaqtaýshy, maqsatty jarnalardy, sondaı-aq avtoturaq pen qoımalardy kútip-ustaýǵa arnalǵan aǵymdaǵy jarnalardy tóleı otyryp, aǵymdaǵy jáne jınaq shottarynyń jaı-kúıi týraly aqparat alýǵa quqyly.

Kondomınıým nysanyn basqarý boıynsha aı saıynǵy jáne jyldyq esepterde, eger bar bolsa, kondomınıým nysanyn basqarýǵa jatpaıtyn qosymsha shyǵystar kórsetilýi tıis, sondaı-aq jalpy múlikti jalǵa berýden túsken kirister jeke jolmen kórsetilýi qajet.

Osyǵan deıin Almatyda qansha turǵyn úı PIK-ten MIB-ke aýysqanyn jazǵan edik.