Qazaqstanda Pfizer vaktsınasynyń qory jetkilikti me - Aıjan Esmaǵambetovanyń jaýaby

NUR-SULTAN. QazAqparat – Taıaýda vedomstvoaralyq komıssııanyń kezekti otyrysynda elimizdegi karantın talaptary qaıta qaralyp, biraz jeńildeı tústi. Mysaly, ǵımarat ishinde maska taǵyp júrýdiń qajeti joq. Sondaı-aq, endigi ýaqytta qazaqstandyqtar Pfizer vaktsınasyn alý múmkindigi týdy. Osy oraıda QazAqparat tilshisi QR Densaýlyq saqtaý vıtse-mınıstri Aıjan Esmaǵambetovadan Pfizer vaktsınasyn egý barysy, jalpy eldegi epıdjaǵdaı týraly surap bilgen edi.

- Aıjan Serikbaıqyzy, koronavırýspen kúreste belgili bir nátıjege qol jetkizdik dep aıta alamyz ba? Eldegi epıdjaǵdaıdyń turaqtalýyna ne áser etti?

- Rasymen qazir Qazaqstanda epıdjaǵdaı turaqtaldy. Búginde kúnine indet juqtyrǵan 50-ge deıin jaǵdaı tirkelip jatady. Aqpanmen salystyrsaq naýryzda koronavırýstyń taraýy 26 esege azaıǵan. Bul vaktsına jáne revaktsınatsııanyń tıimdiligi, sol jumystyń nátıjesi. Qazirgi tańda qoǵamda belgili bir deńgeıde ujymdyq ımmýnıtet qalyptasty. Ekpe alǵandar men koronavırýsqa qaıta shaldyqqandardy esepke alǵanda Qazaqstanda ujymdyq ımmýnıtet ortasha eseppen 65 paıyzdy quraıdy. Eldegi turaqty epıdjaǵdaıdy saqtap, odan ári jaqsarta túsý úshin ujymdyq ımmýnıtetti tómendetip almaý kerek. Ol úshin vaktsına alyp, revaktsınatsııadan ótý qajet. Sondyqtan qazaqstandyqtarǵa revaktsınany ýaqytyly alý kerektigin eske salamyn. Elimizde vaktsına jáne qaıta vaktsına alý úshin de ekpeniń kólemi jetkilikti. Koronavırýspen kúreste, eldegi epıdjaǵdaıdy turaqtandyrýda vaktsına alý jáne revaktsınatsııadan ótý mańyzdy ekenin qaıtalaǵym keledi.

- Pfizer-di barlyq sanattaǵy azamattar tegin ala ma? Atalǵan ekpeni vaktsına jáne revaktsınatsııadan ótetinder alýǵa bola ma?

- Pfizer vaktsınasy barlyq qazaqstandyqtar úshin tegin. Sonymen qatar Pfizer-di vaktsına jáne revaktsınatsııadan ótken kezde de alýǵa bolady. Qazir bizde osy vaktsına túriniń 2 mln-nan astam dozasy bar. Vaktsına jáne revaktsınatsııa úshin de ekpeniń kólemi jetkilikti.

- Búginde elimizde qansha júkti jáne bala emizetin áıelder Pfizer vaktsınasyn aldy?

- Qazirgi kúni jalpy elimiz boıynsha Pfizer-diń birinshi komponentin 930 myń patsıent salǵyzsa, ekinshi komponentti 760 myń adam aldy. Onyń ishinde 638-i jasóspirim, 28 myńy júkti áıel jáne 100 myńǵa jýyq bala emizetin áıel.

- Pfizer vaktsınasy elimizdiń barlyq óńiri úshin qoljetimdi bola ma?

- Pfizer vaktsınasy barlyq aımaqta qoljetimdi bolady. Óńirlerdegi ekpe salý beketterine jetkiziledi. Ózińizge jaqyn nemese yńǵaıly ekpe beketine baryp Pfizer vaktsınasy salǵyza alasyz. Eskere ketetin jaıt, qazaqstandyqtar memlekettik bas sanıtar dárigerdiń jańa qaýlysy shyǵyp, kúshine engen soń ǵana Pfizer vaktsınasyn saldyra alady. Qaýly búgin shyǵady dep josparlanyp otyr.

- Pfizer vaktsınasyn qosymsha satyp alý josparda bar ma? Oıyn-saýyq jáne saýda ortalyqtaryndaǵy ekpe beketteriniń jumysy qaıta jandana ma?

- Qosymsha ekpe salý beketteri ashylmaıdy. Sebebi osy kúnge deıin jumys istep turǵan vaktsına salý beketteri jetkilikti. Sol sııaqty vaktsına qory da jetkilikti. Qosymsha vaktsına satyp alý máselesi týyndaǵan joq. Biz elimizdegi vaktsına jáne revaktsınatsııa protsesin qadaǵalap, baqylaýda ustap otyrmyz.