Qazaqstanda Perýden júzim ákelinýine shekteý engizildi
ASTANA. QazAqparat - Qazaqstan Respýblıkasy Tutynýshylardyń quqyqtaryn qorǵaý agenttigi (budan ári - Agenttik) Tutynýshylardyń quqyqtaryn qorǵaý men halyqtyń salaýattylyǵyn qadaǵalaý salasyndaǵy federaldyq qyzmettiń (Reseıtutynýshylyqqadaǵalaý) hatynyń negizinde quramynda metomıl pestıtsıdi 0,5 mg/kg deıin (norma 0,05 mg/kg kezinde) ruqsat etilgen deńgeıden artqan Perýde óndirilgen júzimdi ákelýge jáne ótkizýge shekteý engizdi, dep habarlady agenttiktiń baspasóz qyzmeti.
Atalǵan ónim Reseı Federatsııasyna, Moldova Respýblıkasyna, Rýmynııaǵa, Ulybrıtanııaǵa, Belgııaǵa jáne Germanııaǵa jetkizilgen.
Joǵaryda atalǵan ónimniń respýblıka aýmaǵyna ákelinýi men ótkizilýiniń úlken yqtımaldyǵyn esepke ala otyryp, Agenttik óńirlerdegi aýmaqtyq bólimshelerine jemis-jıdek ónimderiniń áleýetti ónim berýshilerin habardar etýge, sondaı-aq halyqpen túsindirý jumystaryn júrgizýge tapsyrma berdi.
