Qazaqstanda Pensılvanııa memlekettik ýnıversıtetiniń fılıaly ashylýy múmkin
AQSh-qa jumys sapary barysynda mınıstr birqatar kezdesý ótkizgen.
S.Nurbektiń sózinshe, Amerıka ýnıversıtetteri barlyq álemdik reıtıngilerde laıyqty kósh bastap keledi. Mysaly, bir ǵana Times Higher Education reıtınginde TOP-10 joǵary oqý ornynyń jeteýi — bul AQSh ýnıversıtetteri.
Ekijaqty kelisimder aıasynda S.Nurbek búgin Pensılvanııa memlekettik ýnıversıtetiniń top-menedjmentimen, atap aıtqanda, PennState vıtse-prezıdenti (Provost) Justin Schwartz-pen, vıtse-provost Roger Brindley-men, Pensılvanııa memlekettik ýnıversıtetiniń IT, zań mektebiniń dekandarymen júzdesken.
«Búgingi kezdesýde Qazaqstanda Pensılvanııa memlekettik ýnıversıtetiniń fılıalyn ashý boıynsha naqty qadamdardy talqyladyq. Amerıka joǵary oqý ornynyń basshylyǵy bul bastamaǵa qoldaý kórsetti. Qazirdiń ózinde máseleni tıisti pysyqtaý jumystary bastaldy.
Resmı kezdesýlerden keıin Pensılvanııa memlekettik ýnıversıtetinde oqıtyn qazaqstandyqtarmen jolyqtym. Jastar shetelde oqýdan alǵan óz áserlerimen bólisti. Stýdentterge Qazaqstanda joǵary bilim jáne ǵylym salasynda júrgizilip jatqan reformalar týraly áńgimeledim. Jas zertteýshiler men ǵalymdardy qoldaý boıynsha memleket qolǵa alyp otyrǵan sharalardy erekshe atap óttim», - deıdi mınıstr.
Málim etilgendeı, Saıasat Nurbek Pensılvanııa memlekettik ýnıversıtetiniń ókilderimen buǵan deıin de kezdesken. Onyń nátıjesinde atalǵan oqý orny qazaqstandyq stýdentter men elimizdiń ǵalymdary úshin granttar túrinde 1 mlrd teńge nemese 2 mln dollar kólemindegi tikeleı ınvestıtsııa bólgen. Bul joba qazir iske asyrylýda.
Pensılvanııa memlekettik ýnıversıteti uzaq jyldardan beri Qazaqstannyń seriktesi bolyp keledi. «Bolashaq» baǵdarlamasy bastalǵan sátten barlyq Amerıka JOO-lary arasynda osy ýnıversıtet Qazaqstannan barynsha kóp stýdent qabyldaǵan. Osy ýaqytqa deıin 162 qazaqstandyq atalmysh oqý ornyn aıaqtaǵan.
Foto: t.me/SayasatNurbek
