Qazaqstanda pedofılderdi ómir boıy bas bostandyǵynan aıyrý usynyldy

ASTANA. KAZINFORM – Respýblıkalyq psıhıkalyq densaýlyq ǵylymı-praktıkalyq ortalyǵy pedofılderge ómir boıyna bas bostandyǵynan aıyrý jazasyn engizýdi usynyp otyr. Ortalyqtyń ustanymyn Bizdin Orta podkastynda psıhıatr-dáriger Tamara Nasyrova jetkizdi.

Ortalyqtyń usynysy boıynsha, balalarǵa qarsy qylmys jasaǵan adamdarǵa ómir boıyna bas bostandyǵynan aıyrý jazasy qoldanylýy tıis. Mundaı jaǵdaıda birden eki másele sheshiledi. Birinshiden, qylmysker qoǵamnan oqshaýlanyp, balalarǵa qaýip tóndirmeıdi. Ekinshiden, ómir boıy qamaýda otyrǵandyqtan hımııalyq kastratsııa qajettiligi týyndamaıdy.

- Mundaı shara ekonomıkalyq turǵydan da tıimdi bolýy múmkin, - dedi psıhıkalyq densaýlyq ortalyǵy janyndaǵy patsıentterdi qoldaý qyzmetiniń jetekshisi, psıhıatr-dáriger Tamara Nasyrova.

Aıta keteıik, elimizde 2018 jyldan bastap balalarǵa qatysty jynystyq zorlyq-zombylyq jasaǵan adamdarǵa bas bostandyǵynan aıyrýmen qatar, májbúrli hımııalyq kastratsııa da qoldanylady. Jaza sot úkimi zańdy kúshine engen sátten bastap taǵaıyndalady jáne jazasyn óteý barysynda ári túrmeden bosatylǵannan keıin de dárigerlerdiń baqylaýymen júrgiziledi.

Sondaı-aq suhbat barysynda sheteldik tájirıbe de talqylandy. Keıbir elde osy dárejedegi qylmysqa qatysy bar adamdardyń qaıta qylmys jasamaýy úshin olardy balalar bolýy múmkin nysandarǵa múldem jaqyndatpaıdy.

Odan bólek psıhıatr-dáriger hımııalyq kastratsııa jasalǵan adamnyń kedergini aınalyp ótýi múmkin be jáne bul protsestiń qalaı baqylanatyny týraly saýalǵa jaýap berdi.

Podkastyń tolyq nusqasyn 22 tamyz kúni saǵat 00:30-da «Jibek Joly» telearnasynan kórýge bolady.

Eske sala ketsek, Іshki ister mınıstrliginiń pedofılderdi ómir boıy baqylaýǵa alý jospary baryn habarlaǵan edik.

Aıta keteıik, elimizde pedofılderge túrmeden shyqqanǵa deıin kastratsııa jasalmaq.