Qazaqstanda pedofılder ómir boıy bas bostandyǵynan aıyrylady – zań jobasy
ASTANA. KAZINFORM – Parlament Májilisiniń qaraýyna «Keıbir zańnamalyq aktilerge áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zań jobasy men ilespe qujat engizildi. Aldaǵy ýaqytta depýtattar osy qujat jobasyn talqylaıdy.
«Bul zań jobalary Májilis depýtattarynyń bastamasymen ázirlendi. Joba Memleket basshysynyń otbasyndaǵy zorlyq-zombylyq úshin jaýapkershilikti qatańdatý tapsyrmasyna tolyǵymen sáıkes keledi. Zań jobasynda tıisti negizgi normalardy usynyp otyrmyz. Birinshiden, uryp-soǵýdy jáne densaýlyqqa jeńil zııan keltirýdi qazirgi ákimshilik jaýapkershilikten qylmystyq jaýapkershilikke jatqyzý jáne de jazasyn áldeqaıda qatańdatý eskerilgen. Ekinshiden, jábirlenýshiniń ótinishin kútpeı-aq zorlyq-zombylyq týraly BAQ nemese onlaın platformalardaǵy aqparat negizinde tıisti sharalardy qabyldaý quqyǵyn berý qarastyrylǵan», - dedi depýtat Ashat Aımaǵambetov Májilistiń jalpy otyrysynda.
Onyń aıtýynsha, otbasynda zorlyq-zombylyq jasaǵan adamdardyń agressıvti minez-qulyqyn ózgertý úshin sotqa psıhologııalyq kómek kórsetýdi mindetteý ýákilettiligin berý usynyldy.
«Sonymen qatar, pedofılderdi ómir boıy bas bostandyǵynan aıyrý týraly arnaıy norma bar. Sýıtsıdty nasıhattaý nemese sýıtsıdke ıtermeleý úshin qylmystyq jaýapkershilik engizý eskerilgen. Buǵan qosa, balalarǵa arnalǵan ınternattyq uıymdardy aldyn ala eskertpeı-aq, kez kelgen ýaqytta olardy tekserý jáne taǵy basqa mańyzdy normalar usynyldy. Atalǵan zań jobasy boıynsha Májilistiń Áleýmettik-mádenı damý komıteti qorytyndy ázirleýge daıyn», - dedi Májilis depýtat.
