Qazaqstanda pedıatrııalyq kómek standarty jańartyldy
ASTANA. KAZINFORM — 2025 jyly elimizde damý kemistigi bar balalardy erte anyqtaý jáne súıemeldeý júıesi aıtarlyqtaı nyǵaıtyldy, dep habarlaıdy Densaýlyq saqtaý mınıstrliginiń baspasóz qyzmeti.
Ómirdiń alǵashqy aılarynan bastap damýynyń buzylý qaýpi bar balalardy erte dıagnostıkalaýǵa, aralasýǵa jáne keshendi qoldaýǵa baǵyttalǵan pedıatrııalyq kómek standarty jańartyldy.
— MSAK uıymdarynyń bazasynda 290 erte damý jáne aralasý ortalyǵy ashyldy, sondaı-aq 139 pedıatrııalyq bólimshe quryldy. ıÝNISEF qoldaýymen jas balalardyń damýyn baqylaý boıynsha GMCD nusqaýlyǵy engizilip jatyr. 18 master-jattyqtyrýshy oqytyldy. Barlyq óńirlerde kómektiń sapasyn arttyrý úshin patronajdyq baqylaýdyń ámbebap progressıvti modeli jáne balalar jasyndaǵy aýrýlardy ıntegratsııalanǵan basqarý boıynsha oqý-ádistemelik ortalyqtar quryldy, — delingen mınıstrlik habarlamasynda.
Turaqty oqytý baǵdarlamalaryn, jýrnal klýbyn jáne shala týǵan balalardy kútý boıynsha neonataldyq meıirgerlerdi apta saıyn oqytýdy qosa alǵanda, mamandardy kásibı qoldaýdyń biryńǵaı júıesi qalyptastyryldy.
Erte kútimniń keshendi damýy náreste óliminiń tómendeýiniń jáne eldegi balalardyń ómir súrýiniń ósýiniń negizgi faktorlarynyń birine aınaldy.
Osyǵan deıin 2025 jyly Qazaqstan ana densaýlyǵyn saqtaý júıesin kúsheıtip, áıelderge arnalǵan profılaktıkalyq jáne mamandandyrylǵan qyzmetterdiń qoljetimdiligin keńeıtkeni habarlandy.