Qazaqstanda pedıatr qabyldaýy qyzmetiniń quny qansha
Balany qarap, oǵan em-dom taǵaıyndaıtyn pedıatr dárigerdiń qabyldaýy ádette qymbat bolyp keledi. Kazinform agenttiginiń tilshisi qalalardaǵy qabyldaý qyzmetiniń baǵasyn salystyrdy.
Pedıatr dáriger – bala densaýlyǵyn qaratyp, araǵa birneshe apta, keıde aı salyp qaıta aınalyp soǵatyn maman. Alǵashqy qabyldaýynan keıin qaıta barsa, baǵasy tómendeıdi.
Ata-analar kóbine bala aýyryp, qınalǵanda pedıatr izdeıdi. Keshkilik nemese demalys kúnderi, bala jaǵdaıy álsiregende kómekke júginedi. Mundaıda memlekettik emhana men jeke emhananyń arasynda jaılylyqty emes, jyldam ári tıimdi em kórsete alatynyna basymdyq beredi.
Elimizde jeke emhanalardaǵy dárigerlerdiń qabyldaý qyzmetiniń baǵasy ártúrli. Keı óńirde baǵa qoljetimdi bolsa, keıbirinde joǵary. Baǵaǵa básekelestik, emhananyń ózi, mamannyń biliktiligi men medıtsınalyq qyzmettiń túri de áser etedi.
Biz Qazaqstan qalalaryndaǵy baǵany salystyryp, balasy aýyrǵan ata-analardyń dáriger qabyldaýyna qansha tóleıtinin bildik.
Eń joǵary baǵa Almaty qalasynda tirkeldi. Munda pedıatr dárigerlerdiń qabyldaýy 15 000 teńgeden bastalady. Ata-analar balasyn qarap beretin dáriger qabyldaýyna 20 000 teńge tóleý de qalypty dep sanaıdy. Sonymen birge almatylyq mamandar shaqyrtýmen úıge kelse, artyq aqsha almaıdy. Tek baryp, kelýge qajetti jol shyǵynyn ótese bolǵany.
Elimizdiń Astanasynda baǵa Almatyǵa uqsas. Degenmen qabyldaý qyzmeti tómen dárigerlerdi de tabýǵa bolady. Astana qalasynda pedıatr qabyldaýynyń eń tómen tarıfi – 13 000 teńge. Al eger emhanaǵa bara almasa dárigerler onlaın keńes bere alady. Qashyqtan keńes berý qyzmeti ádettegiden 20% arzan.
Taldyqorǵan men Qaraǵandyda qyzmet quny tómen, biraq elimiz boıynsha bul eń arzany emes. Máselen oblys ortalyǵy Jetisýdaǵy jeke medıtsınalyq ortalyqta pedıatr qabyldaýynyń qyzmeti 7 000 – 15 000 teńge aralyǵynda. Al Qaraǵandyda dáriger qabyldaýy 5 000 teńgeden bastalyp, 15 000 teńgege deıin barady. Munda da onlaın keńes kezinde ata-ana aqshasynyń 20% únemdeı alady.
Aqtóbe qalasynda jeke emhanalardaǵy balalar dárigeriniń qyzmeti 8 400 – 10 000 teńge aralyǵynda baǵalanady. Al eger úıge baryp, em-dom júrgizse, 15 000 teńgeden bastalady. Qala mańyndaǵy aýyldarǵa barsa, 18 000 teńge bolady.
Aqtaý, Atyraý, Qonaev, Óskemen men Semeıde pedıatr qabyldaýynyń qyzmeti orta eseppen alǵanda 8 000 – 10 000 teńge bolyp tur. Úıge shaqyrý qyzmeti de bar. Bul qalalarda arnaıy jeńildik sanatyna jatatyn naýqastarǵa baǵa sál tómen.
Kókshetaý, Oral men Tarazda ortasha baǵa 8 500 teńge shamasynda. Aqmola oblysynda kópshilikke tanymal jeke emhanadaǵa baǵa 7 000 teńgeden bastalady. Alaıda memlekettik emhanalarda aqyly qyzmet te qarastyrylǵan. Olystyq balalar aýrýhanasyndaǵy aqyly qabyldaý quny – 5 675 teńge. Oral men Tarazda baǵa orta eseppen 7 000 teńgeden bastalyp, 10 000 teńgege jetedi.
Qostanaı men Qyzylordada pedıatr keńesiniń ortasha quny – 8 000 teńge. Eger bes kún ishinde bala densaýlyǵyn taǵy bir ret teksertýdi qalasańyz, 4 000 teńge tóleý jetkilikti. Al dárigerdi úıge shaqyrtý qyzmeti eki ese qymbat, onlaı keńes alý qabyldaýǵa qaraǵanda eki ese arzanǵa túsedi. Qostanaı qalasynda jańa týǵan nárestege keshendi medıtsınalyq kómek kórsetý qyzmeti de bar. Baǵasy 30 000 teńgeden bastalady.
Shymkent, Jezqazǵan men Pavlodarda balalar dárigeriniń qabyldaýy ortasha eseppen – 7 500 teńge. Sonyń ishinde Jezqazǵanda elimiz boıynsha eń arzan qyzmet bar. Baǵasy 3 000 teńgeden bastalady. Al dárigerdi úıge shaqyrsa úsh qalada da baǵa 15 000 teńge jáne odan joǵary.
Elimiz boıynsha Petropavl men Túrkistan qalalarynda pedıatrdyń alǵashqy qabyldaýy arzan bolyp tur. Munda keńes berý ortasha eseppen alǵanda 3 000 teńgeden bastalyp, 6 000 teńgege jetedi. Sonyń ishinde elimizdiń ońtústigindegi jeke emhanalardyń kóbinde qabyldaý qyzmeti arzan. Al úıge shaqyrý eki qalada da 12 000 teńgeden bastalady.
Buǵan deıin Qazaqstanda qan men zár taldaýynyń baǵasy týraly jazyldy.