Qazaqstanda pedagogterge suranys artty – eńbek naryǵyndaǵy statıstıka
Mınıstrlik aqparatyna sáıkes, bıylǵy shilde aıynda Elektrondyq eńbek bırjasynda (EEB) bos jumys oryndary týraly 87 myń málimet jáne 70,6 myń túıindeme ornalastyryldy. Maýsym aıymen salystyrǵanda bos oryndar sany 30% tómendep, ózekti túıindemeler sany 18% artqan. Sondaı-aq eńbek naryǵynyń maýsymdyq erekshelikteri esebinen biliktiligi tómen kadrlarǵa suranys azaıǵan.
Óńirler boıynsha jumys berýshiler tarapynan usynys tómendedi: Jambyl oblysynda – 71%, Qyzylorda oblysynda – 55%, Aqtóbe oblysynda – 52% jáne Soltústik Qazaqstan oblysynda 48%. Usynys artty: Batys Qazaqstan jáne Almaty oblystarynda – tıisinshe 13% jáne 4%.
«Oqý kezeńiniń bastalýyna baılanysty orta jáne mektepke deıingi bilim berý mekemelerinde kadrlarǵa degen suranys joǵary: qazirgi ýaqytta qajettilik 10,2 myń bos jumys ornyn nemese barlyq bos jumys oryndarynyń 12% quraıdy. Bos jumys oryndarynyń kópshiligi Qaraǵandy (899 bos oryn), Jambyl (792 bos oryn) jáne Almaty (737 bos oryn) oblystarynda ornalastyryldy. Jalpy Qazaqstan boıynsha muǵalimderdiń ortasha jalaqysy 109,4 myń teńgeni quraıdy», – dedi «Eńbek resýrstaryn damytý ortalyǵy» AQ Basqarýshy dırektory Aleksandra Molchanovskaıa.
Suranysqa ıe mamandar reıtıngisinde ekinshi orynda aýyl sharýashylyǵy jáne turǵyn úı qurylysy kásiporyndary (4 myń bos jumys orny nemese 5 paıyzdan) tur. Bul rette aýyl sharýashylyǵy salasyndaǵy bos oryndardyń 36% Túrkistan oblysyna tıesili, al qurylys salasyndaǵy vakansııalardyń jartysyna jýyǵy (43%) Nur-Sultan qalasynda jarııalanǵan.
Osy jyldyń shilde aıynda biliktiligi tómen qyzmetkerlerge suranys ótken aımen salystyrǵanda 2 esege – 50,6 myńnan 28,7 myńǵa deıin azaıdy. Al usynys 11%, ıaǵnı 29,1 myńnan 25,8 myńǵa deıin tómendedi.
Vedomstvo málimetinshe, orta bilikti mamandarǵa arnalǵan vakansııa sany usynystan 1,7 ese asyp tústi: 38,9 myń bos oryn, 23,6 myń túıindeme.
Bos jumys oryndary men túıindemeler arasyndaǵy eń úlken alshaqtyq, ıaǵnı maman defıtsıti joǵary oqý oryndarynyń oqytýshylary arasynda baıqalady: vakansııa – 1331, túıindeme – 945, sondaı-aq dárigerler boıynsha bos oryn – 1772, túıindeme – 605, kúzetshiler boıynsha bos oryn – 1685, túıindeme – 463 jáne tárbıeshiler boıynsha bos oryn – 1450, túıindeme –990.
Kerisinshe, profıtsıt zańger (1143 bos orynǵa 331 túıindeme), ekonomıst (182 bos orynǵa 457 túıindeme), feldsher (174 bos orynǵa 735 túıindeme), vahter (130 bos orynǵa 864 túıindeme), kýrer (123 bos orynǵa 465 túıindeme) jáne bilikti emes jumysshylarǵa (1245 túıindemege 644 bos oryn) baıqalady.
Jumys izdeýshiler eń kóp óńirler: Shymkent qalasynda – 6 myń túıindeme, Jambyl oblysynda 5,5 myń túıindeme, Aqtóbe oblysynda 4,7 myń túıindeme, Almaty qalasynda 3,5 myń túıindeme.
Bir aıda túıindemelerdiń jalpy sany muǵalimderden 2,3 esege (2,8 myńnan 6,5 myńǵa deıin túıindeme), zańgerlerden – 1,7 esege (677-den 1143 túıindemege deıin) jáne tárbıeshilerden 1,6 esege (609-dan 990 túıindemege deıin) kóbeıdi.
Eń joǵary jalaqy alǵysy keletin mamandar da belgili boldy, óz túıindemesinde avıatsııa ınjenerleri– 3,3 mln teńge eńbekaqy kórsetken. Sondaı-aq joǵary býyn basshylary – 2 mln teńge, bas aýdıtorlar, ǵarysh ınjenerleri, bas dırektorlar aıyna 1 mln teńge tabys tapqysy keledi.
Jumys berýshiler tarapynan usynylyp otyrǵan jalaqy: ushqyshtarǵa ortasha eseppen – 900 myń teńge, bas qurylysshylarǵa – 700 myń teńge, jóndeý – mehanıkalyq sheberhanasynyń meńgerýshilerine jáne burǵylaý jónindegi sýpervaızerlerge – 600 myń teńge.
«Jumys izdeýshiler tarapynan belsendiliktiń ósýine jáne jumys berýshilerden suranystyń tómendeýine qaramastan, keıbir kadrlarǵa jalpy tapshylyq aıqyn. Biliktiligi tómen izdenýshiler tarapynan baıqalyp otyrǵan qyzyǵýshylyqtyń báseńdeýi maýsymdyq jumystarmen baılanysty», - delingen mınıstrlik aqparatynda.
