Qazaqstanda pedagogterdi jumysqa qabyldaý júıesi avtomattandyryldy

ASTANA. KAZINFORM – 1 sáýirden bastap QR Oqý-aǵartý mınıstrligi Ulttyq bilim berý derekter qorynda pedagogterdi mektepke jumysqa qabyldaý boıynsha jańa modýldi iske qosady. Bul shara sybaılas jemqorlyqqa qarsy jáne konkýrstyq rásimderdi ashyq ótkizýge baǵyttalǵan.

Sondaı-aq pedagogterdi attestattaýda qujattardy tapsyrý boıynsha da avtomattandyrý engizilýde.

Endi pedagogterdiń barlyq málimetteri «Pedagog portfolıosy» modýlinde jınaqtalady. Munda pedagog týraly, onyń bilimi, densaýlyq jaǵdaıy, jumys tájirıbesi, quqyq buzýshylyqtar, attestattaýdan ótý, marapattary jáne tálimgerlik pen tsıfrlyq qujattar týraly elektrondyq aqparat saqtalady.

«Ashyqtyq pen eseptiliktiń bolýy sybaılas jemqorlyqqa qarsy kúreste basty ról atqarady. Osy modýlderdi engize otyryp, pedagogterdi jumysqa qabyldaý kezinde qaǵaz júzindegi qujat aınalymyn jáne sybaılas jemqorlyq táýekelderin tolyq joıý josparlanýda. Júıeni iske qosý aldynda basqarma, bólimder men bilim berý uıymdarynyń mamandary úshin oqytý uıymdastyryldy», - deıdi QR OAM Tsıfrlandyrý departamenti dırektorynyń orynbasary Maıra Maralbaeva.

Eske sala keteıik, buǵan deıin atalǵan modýl Shymkent qalasynda jáne Qaraǵandy oblysynyń Shahtınsk qalasynda synaqtan ótti.

Sondaı-aq jumys izdeý jáne qajetti personaldy tańdaý boıynsha elimizdiń basqa óńirlerinde de ashyqtyq jaǵdaı jasaý úshin UBDQ-nyń «Elektrondyq eńbek bırjasy» platformasymen ózara ıntegratsııasy josparlanǵan.