Qazaqstanda paıdalaný merzimi 10 jyldan asqan kólikter sany 80 paıyzdy quraıdy - T. Ómirzaqov
ASTANA. 20 aqpan. QazAqparat - Qazaqstanda paıdalaný merzimi 10 jyldan asqan kólikter sany 80 paıyzdy quraıdy.
Búgin Parlament Májilisininiń spıker Nurlan Nyǵmatýlınniń tóraǵalyǵymen ótken otyrysynda Úkimet basshysynyń atyna saýal joldaǵan depýtat Tursynbek Ómirzaqov osylaı málim etti.
Depýtattyń aıtýynsha, búgingi tańda elimizde 3,5 mln.-nan astam jeńil avtokólik tirkelgen. «Bul rette jalpy kólikterdiń 3 mln.-ǵa jýyǵy nemese 80 paıyzynyń paıdalaný merzimi 10 jyldan asqan. Shyǵarylǵan jylynan bastap merzimi 7 jyldan aspaıtyn kólikter nebári 13 paıyzǵa tıesili. Eýropamen salystyratyn bolsaq, onda avtokólikterdiń ortasha paıdalaný merzimi nebári 8 jyldy quraıdy. Paıdalaný merzimi 10 jyldan asqan kólikter 35 paıyzdan tómen bolsa, sondaı-aq eskirgen jáne moraldyq jaǵynan tozǵan avtokólikter sanynyń ósýi ekologııalyq jáne jol qaýipsizdigi turǵysynan keri áser etedi», - deıdi T. Ómirzaqov.
Onyń aıtýynsha, Eýropada eskirgen kólikterdi qaıta óńdep kádege jaratýdyń ortasha deńgeıi jylyna 60 paıyzdy quraıdy. «al Qazaqstanda avtokólikterdiń meılinshe tozýyn eskeretin bolsaq, bul kórsetkish odan da joǵary bolýy múmkin. Endeshe, Qazaqstanǵa jylyna 220 myń avtokólikterdi paıdalanýdan alyp, ony qaıta kádege jaratýǵa joldaý qajet», - dedi Tursynbek Ómirzaqov.
