Qazaqstanda paıdalanylǵan akkýmýlıatorlardy qaıta óńdeý jobasy júzege asyrylýy múmkin
ASTANA. KAZINFORM — Premer-mınıstriniń birinshi orynbasary Nurlybek Nálibaev CATL kompanııasynyń delegatsııasymen kezdesý ótkizdi. Bul týraly Úkimettiń baspasóz qyzmeti habarlady.
Kezdesý barysynda Qazaqstanda mıneraldyq shıkizatty tereń óńdeý, akkýmýlıatorlyq batareıalar, energııa jınaqtaý júıeleriniń óndirisi jáne paıdalanylǵan akkýmýlıatorlardy qaıta óńdeý salalaryndaǵy ınvestıtsııalyq jobalardy júzege asyrý perspektıvalary talqylandy.
Nurlybek Nálibaev Qazaqstan Úkimeti joǵary tehnologııalyq óndiristerdi damytýǵa jáne qosylǵan quny joǵary ónim shyǵaratyn jetekshi halyqaralyq kompanııalarmen uzaqmerzimdi áriptestikti keńeıtýge erekshe mán beretinin atap ótti.
Taraptar shıkizatty óńdeýden bastap akkýmýlıatorlar men energııa jınaqtaý júıelerin óndirýge, sondaı-aq paıdalanylǵan batareıalardy qaıta óńdeýge deıingi tolyq óndiristik tizbekti qalyptastyrý máselelerin qarastyrdy.
Kezdesý qorytyndysy boıynsha taraptar ınvestıtsııalyq yntymaqtastyqty odan ári damytýǵa jáne birlesken jobalardy júzege asyrý boıynsha ózara múddeliligin rastady.
Anyqtama:
«CATL» – elektr kólikterine arnalǵan akkýmýlıatorlar men energııa jınaqtaý júıelerin óndirý boıynsha álemdegi jetekshi kompanııa. 2025 jyldyń qorytyndysy boıynsha kompanııanyń akkýmýlıatorlyq ónimderdi ótkizý kólemi 661 GVt·saǵ-qa jetip, túsimi $62,2 mlrd, al taza paıdasy $10,6 mlrd-ty qurady. Kompanııa elektr kólikterine arnalǵan akkýmýlıatorlardy jetkizý boıynsha qatarynan toǵyzynshy jyl, al energııa jınaqtaý júıeleri boıynsha qatarynan besinshi jyl álemdik kóshbasshylyqty saqtap keledi.
Aıta ketelik iri halyqaralyq kompanııa Alatau City jobasyna ınvestıtsııa salýǵa nıetti.
