Qazaqstanda patsıentterdiń shaǵymy boıynsha 1104 jospardan tys tekserý júrgizildi
ASTANA. KAZINFORM – Bıyl Qazaqstanda patsıentterdiń shaǵymdary negizinde medıtsınalyq qyzmet kórsetý salasynda myńnan astam jospardan tys tekserý júrgizildi. Onyń nátıjesi týraly QR Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti Kazinform saýalyna bergen jaýabynda aıtyp berdi.
Komıtet tóraǵasynyń orynbasary Jandos Ádilhannyń málimetinshe, vedomstvo medıtsınalyq qyzmet kórsetý salasynda memlekettik baqylaý men qadaǵalaý júrgizedi. Al medıtsınalyq qyzmetterdiń sapasy Kásipkerlik kodeksine sáıkes tekseriledi.
– 2026 jyldyń 1 jartyjyldyǵynda Komıtet patsıentterdiń shaǵymdary boıynsha jospardan tys 1104 tekserý júrgizdi, sóıtip 481 sýbektige qatysty ákimshilik aıyppul salyndy, anyqtalǵan buzýshylyqtar boıynsha 783 nusqama berildi, - dedi spıker.
Sonymen qatar óńirlerde zańsyz medıtsınalyq qyzmet kórsetý jaǵdaılaryn anyqtaý boıynsha monıtorıng júrgizilip jatqanyn atap ótti.
– Oǵan ákimdikter janyndaǵy qoǵamdyq monıtorıngtik toptar tartyldy. Monıtorıng barysynda táýeldiligi bar adamdardy emdeý jáne ońaltý qyzmetterin kórsetetin 154 nysan, sondaı-aq 356 emshara kabıneti tekserildi, - dedi ol.
Medıtsınalyq qyzmetterdiń sapasy men qaýipsizdigin baqylaý tetikteri de kúsheıtilgenin de atap ótti. Máselen, 2025 jyly Komıtetke jedel den qoıý sharalaryn qoldanýǵa múmkindik beretin qadaǵalaý fýnktsııasy berilgen. Sonyń aıasynda vedomstvo belgili bir jaǵdaılarda sýbektiniń qyzmetin ýaqytsha toqtata alady. Sondaı-aq onyń sózinshe, medıtsına qyzmetkerinde qajetti ruqsat qujattary bolmasa, ony kásibı qyzmetten shettetý sharasy qoldanylýy múmkin.
