Qazaqstanda páter jóndeý: quny, merzimi jáne nesıe múmkindikteri
ASTANA. KAZINFORM — Qazaqstanda bir bólmeli páterdi orta eseppen 5 mıllıon teńgege jóndeýge bolady. Bul týraly Jibek Joly arnasynyń «Búgin LIVE» baǵdarlamasynda qurylysshy mamany aıtty.
Jasulan Mátenovtyń sózinshe, 40 sharshy metrli 1 bólmeli páterdi tolyq jóndeýge shamamen 1-1,5 aı ýaqyt ketedi.
– 40 sharshy metrlik bir bólmeli páterdiń jóndeý jumystaryn júrgizý úshin 1-1,5 aı ýaqyt ketedi.
Tutynýshylardyń eń negizgi ótinishteri – esiktegi elektrondy qulyptyń qupııa kodyn aýystyrý. Birinshi naryqtaǵy páterdi alyp jatqan kezde qaıta josparlaýǵa bola ma? Ony qalaı isteımiz? Kimge baramyz? Osyndaı suraqtarmen de jıi keledi, - deıdi ol.
Sondaı-aq ol jóndeý jumystarynyń qalaı júrgiziletinin atap ótti.
– Páterdi alǵan soń eń birinshi jumys toq júrgizýden bastalý kerek. Toqtan keıin edendi isteý jumystary bastalady. Ári qaraı árleý jumystarymen jalǵasady. Eń sońynda kerme tóbemen túıindeımiz. Sosyn ylǵaldy tazalyq jumystaryn júrgizip, jıhazdardy kirgizý kerek. Sodan soń páter daıyn, - dedi maman.
Qurylysshy jańa úılerde jóndeýdi bastamas buryn dızaın jobasyn anyqtaý mańyzdy ekenin de aıtty.
– Jańa salynyp bitken úılerge jóndeý jumysyn bastamaı turyp dızaınyn anyqtaý mindetti. Dızaınsyz jumysty bastaı almaımyz. Sol dızaınǵa qarap, páterdegi jóndeý jumystary bastalady. Dızaınnyń aldyn ala daıyn bolǵany qurylysshylar úshin de tıimdi, - dep qosty Jasulan Mátenov.
Onyń aıtýynsha, jóndeý jumystarynyń quny ár úı ıesiniń múmkindigine baılanysty.
– Máselen bıznes sanatyndaǵy úılerdi sońǵy trendtermen jóndegińiz kelse 10 mıllıonǵa deıin shyǵyn shyǵady. 40 sharshy metrlik 1 bólmeli páterdi orta eseppen 5 mıllıonǵa jóndeýge bolady. Onyń ishine toq júrgizý, eden, árleý, esik, jýyný bólmesindegi qurylys jabdyqtary, kerme tóbe kiredi, - dedi ol.
Sonymen qatar ol jóndeý aldynda naryqty zertteýge keńes berdi.
– Eń áýeli qajetti quraldardyń tizimin jazyp shyǵyp, naryqtaǵy baǵany salystyrý kerek. Sosyn qaı jaqta arzan bolsa, sol jaqtan satyp alǵan durys, - dedi maman.
Qurylysshy jóndeý barysynda jıi jiberiletin qatelikterge de toqtaldy.
– Jóndeý jumystaryn júrgizgen kezdegi eń basty qatelikter arzan qurylys materıaldardy alý. Eń birinshi elektr kabelderinen aqshany aıamaý kerek. Óıtkeni órt qaýpi bar. Kabelderdiń eń qymbatyn tańdaý qajet. Árleý jumystaryna qatysty gıpsti de únemdeýge bolmaıdy. Óıtkeni sapasyz gıpster ýaqyt óte qulaıdy. Bul eki jumys bolady, - dep eskertti Jasulan Mátenov.
Baǵdarlamada turǵyn úıdi jóndeýge nesıe alý múmkindikteri de sóz boldy. Bul týraly «Otbasy bank» AQ ortalyq fılıaly basshysynyń orynbasary Dárııa Bátenova túsindirdi.
– Bizdiń tutynýshylarymyz jóndeý júrgizilmegen úı alǵan jaǵdaıda olarǵa qosymsha qarajat kerek bolady. Muny nesıege qajetti bir ótinishpen aq retteýge bolady. Mysaly siz 30 mıllıonǵa úı almaq bolsańyz, 35 mıllıonǵa deıin nesıe ala alasyz. Biraq ol úshin shotyńyzda sol qarjynyń jarty aqshasy jınaýly turý kerek. Eger sizdiń atyńyzda burynnan turyp jatqan úıińiz bolsa, oǵan jóndeý jumystaryn júrgizý kerek bolsa, ol úıge de 3,5-8,5 paıyz aralyǵynda nesıe ala alasyz. Ol úshin qarjynyń jartysy jınaýly bolý qajet, - dedi Dárııa Bátenova.
Aıta keteıik, Oral qalasynda zańsyz dep tanylǵan birneshe qurylys nysany buzyldy.
