Qazaqstanda páter ıeleri jaldamaly úıler naryǵyndaǵy baǵany kóterýde
ASTANA. QazAqparat - Qazaqstanda páter ıeleri jaldamaly úıler naryǵyndaǵy baǵany kóterýde. Maýsym aıyndaǵy maýsymdyq baǵa quldyraýynan keıin ortasha stavka jyldyq eń joǵary shekke jetip, sharshy metrine 1273 teńgeni qurady.
Qazan aıynyń qorytyndysyndaǵy ósim generatory Almaty men Taraz qalasy bolyp otyr. Bul jaıynda Ranking.kz mamandary ázirlegen Qazaqstandaǵy jalǵa beriletin páterler stavkasyna jasalǵan sholýda aıtylǵan.
1 jyldyń ishinde (2014-2015 jyldardyń qazany) Qazaqstanda úılerdiń jalǵa berilý quny 4 paıyzǵa ósip, sharshy metrine 1273 teńgege jetken. Elimizde Astanadan basqa barlyq iri qalalarda baǵa ósimi baıqalady. Astanada jyldyq tómendeýge (-1,7 paıyz) qaramastan baǵa áli de elimiz boıynsha eń joǵary bolyp tur. Qazan aıynda elordada 1 sharshy metrdi jalǵa alý quny 2,7 myń teńgeni quraǵan bolatyn. Bul ortasha respýblıkalyq kórsetkishten 2 ese joǵary. Ekinshi orynda Almaty (2,5 myń teńge), al úshinshi orynda Aqtaý (2,2 myń teńge) tur. Taraz, Jezqazǵan jáne Qyzylorda qalalarynda páterlerdi jaldaý quny eń tómengisi.
Naryqtaǵy baǵa ósimine qaramastan memlekettik jalǵa beriletin úılerdiń jeńildik stavkalary ózgerissiz qalyp otyr.
Almaty men Astana qalalarynda «Báıterek» holdınginiń óńirlerdi damytý memlekettik baǵdarlamasy aıasynda salǵan jaldamaly úıleriniń quny 1 aıǵa sharshy metrine 1120 teńgeni qurady. Bul atalǵan megapolısterdegi naryqtyq baǵadan 2 esege tómen. Qalǵan óńirlerde memlekettik turǵyn úıdi jaldaý quny 923 teńgege teń.
