Qazaqstanda parnık gazdar shyǵaryndylaryna kvotany arttyrǵany úshin aıyppul mólsheri azaıtylmaq
ASTANA. QazAqparat - Elimizde parnık gazdar shyǵaryndylaryna kvotany arttyrǵany úshin aıyppul mólsheri azaıtylmaq. Sonymen qatar, jaýapkershiliktiń bastalý merzimi shegeriledi. Bul týraly búgin Parlament Májilisiniń jalpy otyrysynda Qorshaǵan orta jáne sý resýrstary mınıstri Nurlan Qapparov osylaı málim etti. Otyrysta Ákimshilik quqyq buzýshylyq týraly kodeksine ózgerister engizý máselesi talqylanǵan bolatyn.
N. Qapparovtyń aıtýynsha, aıyppul mólsherin tómendetý jáne oǵan qatysty sanktsııalardy engizý máselesin mınıstrlik qana emes, Májilis depýtattary da kótergen.
«Biz byltyrǵy jyl boıynsha shyǵaryndylaryn belgilengen kólemnen asyrǵany úshin kásiporyndarǵa aıyppul tóletýdi orynsyz sanaımyz. Óıtkeni, olar jańa júıege enýge daıyn bolmaı qalady. Jalpy, elimizdegi óndiris kólemi 2010 jylmen salystyrǵanda on bes paıyzǵa ósti, sonymen qatar, shyǵaryndylardyń kólemi de óskeni belgili. Osyǵan oraı, sanktsııalardy engizý arqyly óndiristik sektordan eleýli qarjy shyǵarýǵa múmkin bolar edi. Alaıda, soǵan qatysty óndirister toqtap, jumys oryndardyń qysqarýy áleýmettik jaǵdaıdy aýyrlatar edi. Mine, aıyppul mólsherin on aılyq eseptik kórsetkishten bes aılyq eseptik kórsetkishke deıin tómendetý osyndaı sebepterge baılanysty týyndap otyr», - dedi Qorshaǵan orta jáne sý resýrstary mınıstri.
Onyń paıymynsha, bes aılyq eseptik kórsetkish shamamen 37 eýrony quraıdy. Artyq shyǵarylǵan parnıktik gazdardyń árbir tonnasy úshin tólenetin aıyppuldyń osyndaı mólsherin jetkilikti. «Aldyn ala boljamdar boıynsha kvotalardyń naryqtaǵy baǵasy bes eýrodan aspaıdy. Máselen, 2010 jyly Eýroodaqta 1 kvotanyń baǵasy 27 eýroǵa deıin ǵana kóterilgen. Búgingi kúni Eýropadaǵy aıyppul mólsheri 100 eýro. Alaıda, Qazaqstan men Eýroodaq elderiniń tehnologııalyq alshaqtyǵyn nazardan tys qaldyrýǵa bolmaıdy. Sondyqtan da, búgin aıyppul mólsherin eýropalyq deńgeıge kóterý ekonomıkalyq turǵydan orynsyz», - dedi mınıstr N. Qapparov.
Aıta keteıik, parnıktik gazdar shyǵaryndylaryna kvotany arttyrǵany úshin aıyppul mólsherin tómendetý qarastyrylyp otyrǵany belgili. Al mundaı normalardy qabyldansa, ónerkásip kásiporyndarynan 2013 jyly esepke jazylǵan energetıka salasyndaǵy 208 mlrd. teńge, munaı jáne gaz sektorynda 30 mlrd. teńge óndirip alynbaıtyn bolady.
