Qazaqstanda parlamenttik saılaýǵa 112 eldiń ókilin shaqyrady

ASTANA. QazAqparat - QR Parlamenti Májilisi men barlyq deńgeıdegi máslıhat depýtattary saılaýyna 112 eldiń ókilderi shaqyrylady. Bul týraly búgin QR Parlamenti Májilisi men máslıhat depýtattary saılaýyn ázirleý jáne uıymdastyrý máseleleri jónindegi respýblıkalyq semınar-keńeste QR Ortalyq saılaý komıssııasynyń múshesi Tatıana Ohlopkova málim etti.

Onyń atap ótýinshe, OSK tóraǵasy 18 sheteldiń Ortalyq saılaý komıssııalarynyń birinshi basshylaryna shaqyrý jibergen. Al elimizdiń Syrty ister mınıstri 18 halyqaralyq uıymǵa, sonymen qatar osy uıymdardyń aıasynda 112 memleketke shaqyrý jóneltti.

Osy rette T.Ohlopkova 2012 jyldyń 15 qańtarynda ótken Májilis pen barlyq deńgeıdegi máslıhat depýtattarynyń saılaýyna Ortalyq saılaý komıssııasy men Syrtqy ister mınıstrligi 975 halyqaralyq baıqaýshy men sheteldik BAQ ókilderin tirkegendigin eske saldy. Saılaý kúninde saılaý ýchaskelerinde 43735 qazaqstandyq jáne halyqaralyq baıqaýshylar, senimdi tulǵalar men BAQ ókilderi baıqaý júrgizgen.

Munan bólek, ol 2015 jyldyń sáýirinde ótken Prezıdent saılaýyna 1024 halyqaralyq baıqaýshy men BAQ ókili akkredıttelgenin, al saılaý ýchaskelerde baıqaý júrgizýge ókilettigi bar 31 myńnan astam adam qatysqanyn aıtty.

Esterińizge sala keteıik, parlamenttik saılaýǵa sheteldik baıqaýshylardy tirkeý naýryzdyń 14-inde aıaqtalady.