Qazaqstanda Parlamentarızm ınstıtýty quryldy
«Memleket basshysy óziniń 2019 jylǵy 2 qyrkúıektegi Qazaqstan halqyna arnaǵan Joldaýynda Parlament janynan zańdardyń sapasyn arttyrýǵa yqpal etetin tıisti qurylym qurýdy tapsyrdy.
Úkimet Parlamentpen birlesip Parlamentarızm ınstıtýtyn qurý úshin qajetti sharalar qabyldady.
Jańa qurylym qyzmetiniń negizgi nysanasy – zańnamanyń tıimdiligin taldaýdy (normatıvtik quqyqtyq aktilerdi taldaý) qamtamasyz etý, Qazaqstan Respýblıkasynyń zańnamasyn damytýdyń ǵylymı tujyrymdamalaryn ázirleý arqyly Qazaqstan Respýblıkasynda parlamentarızmdi damytý jáne onyń tıimdiligin arttyrý.
Osyndaı ınstıtýttar birqatar damyǵan elderdiń zań shyǵarýshy organdarynyń janynda jumys isteıdi. Olardyń jumysy qabyldanatyn zańdardyń sapasyn qamtamasyz etý qajettiligine tikeleı baılanysty. Zań jobalaryn muqııat pysyqtaý naqty salalarda arnaıy bilimdi talap etedi», - delingen qos palata taratqan aqparatta.
Málim etilgendeı, Parlamentarızm ınstıtýty depýtattarǵa kelesi máseleler boıynsha járdemdesetin bolady: zańnamaǵa ózgerister engizý qajettiligin ǵylymı negizdeýdi, jańa normalardy engizýdi, zań jobalarynyń ózin ázirleýdi jáne qajet bolǵan jaǵdaıda qarjylyq-ekonomıkalyq esepterdi daıyndaýdy, sondaı-aq zańdardy iske asyrýdyń yqtımal ekonomıkalyq, áleýmettik, zańdyq, ekologııalyq saldarlarynyń boljamdaryn ázirleýdi qosa alǵanda, olardyń zań shyǵarý bastamasy quqyǵyn iske asyrýǵa.
«Munda depýtattyq korpýspen birge Úkimettik nusqalarǵa balamaly zańnamalyq normalar ázirlenetin bolady. Bul qabyldanatyn zańdardyń sapaly pysyqtalýyna yqpal etedi.
Budan basqa, jańa qurylym Memlekettik basqarýdyń tıimdiligin arttyrýdyń quqyqtyq tásilderin zerdeleýmen, ekonomıkalyq jáne qoǵamdyq ómir salalaryn zańnamalyq retteýdi ońtaılandyrý jóninde usynystar ázirleýmen, sondaı-aq qoldanystaǵy zańnamanyń tıimdiligin taldaýmen aınalysady.
Sondaı-aq, ınstıtýt zańnamany jetildirý boıynsha usynystar ázirleý, damyǵan shet elder parlamentshileriniń tájirıbesin zerdeleý úshin qoǵamda áleýmettik jáne saraptamalyq saýalnamalar júrgizetin bolady.
Aldaǵy kezeńde jańa qurylym memlekettik tirkeý rásiminen ótip, onyń Jarǵysy bekitiledi.
Instıtýttyń qyzmeti qosymsha qarjylyq shyǵyndardy talap etpeıdi, óıtkeni ol kózdelgen bıýdjettik shyǵystar sheńberinde júzege asyrylady», - delingen baspasóz baıanynda.