Qazaqstanda Parlament, máslıhat otyrystary men jyl qorytyndysyna arnalǵan memlekettik organdardyń alqa otyrystary tikeleı kórsetiledi

Bul týraly búgin QR Parlamenti Májlisinde «Aqparatqa qoljetimdilik týraly» Zańnyń jobasyn tanystyrǵan keıin BAQ ókilderine suhbat bergen Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev aıtty.

M.Áshimbaev tanystyrǵan Zań jobasynda Zań normalarynyń kúshi qoldanylatyn aqparat ıelenýshi sýbektilerdiń tizbesi men aqparatqa qol jetkizý tásilderin keńeıtý usynylǵan. Atap aıtqanda, QR Parlamentiniń nemese onyń palatalarynyń, QR oblysynyń, respýblıkalyq mańyzy bar qalasynyń, astanasynyń jergilikti ókildi organdarynyń ashyq otyrystaryn jáne memlekettik organdardyń jyl qorytyndysy boıynsha ótkiziletin alqa otyrystaryn ınternet-resýrstarda onlaın translıatsııalaý arqyly qamtamasyz etý usynylyp otyr.

«Bul norma Parlament úshin, máslıhat úshin jáne memlekettik organdardyń qorytyndy alqa otyrystary úshin mindetti»,- dedi ol.

Sonymen qatar depýtat BAQ ókilderiniń osyǵan deıin Parlament óz otyrystaryn tikeleı kórsetkenimen keıinnen ony alyp tastaǵanyna qatysty saýalyna jaýap berdi.

«Másele tehnıkalyq turǵyda týyndaýy múmkin. Biraq, zań jobasynda Parlament otyrystarynyń ashyqtyǵy aıtylǵan. Munyń barlyǵy da translatsııalanady jáne barlyǵy Parlament otyrystaryn onlaın-rejimde kórý múmkindigine ıe bolady», - dedi depýtat.