Qazaqstanda paralımpıadalyq sport tarıhynda tuńǵysh ret halyqaralyq jarys júldegerine syıaqy beriledi
ASTANA. 22 tamyz. QazAqparat - Monrealda (Kanada) ótken tirek-qımyl apparaty buzylǵan jáne kórý qabileti nashar sportshylar arasynda sýda júzýden álem chempıontynda jaqsy nátıjege qol jetkizgen QR Ulttyq paralımpıadalyq quramasy elge oraldy.
Ulttyq paralımpıadalyq komıtettiń baspasóz qyzmetinen habarlaǵandaı, Almaty áýejaıynyń aldyna jıylǵandar halyqaralyq sport sheberleri: Monrealda ótken álem chempıonatynyń kúmis jáne eki dúrkin qola júldegeri Zúlfııa Ǵabıdýllına men Azııa rekordshysy Ánýar Ahmetov, olardyń bapkerleri - QR eńbek sińirgen jattyqtyrýshylary Sattar Beısembaev pen Vladımır Zagodernyıdy qarsy aldy.
Eske sala ketsek, 12-18 tamyz aralyǵynda Kanadanyń Monreal qalasynda júzýden tirek-qımyl apparaty buzylǵan jáne kórý qabileti nashar sportshylar arasynda álem chempıonaty ótti. Álemdik birinshilikke 60 elden 650 sportshy qatysty, 172 júlde sarapqa salyndy.
Chempıonatta Qazaqstan namysyn Ánýar Ahmetov pen Zúlfııa Ǵabıdýllına qorǵady.
Jarystyń bes kúniniń qorytyndysy boıynsha, QR quramasynyń qorjynynda úsh júlde - 48 jastaǵy Zúlfııa Ǵabıdýllına qol jetkizgen kúmis júlde (álemdik rekordtpen qosa) jáne eki qola medal bar.
QR Ulttyq paralımpıadalyq komıtetiniń prezıdenti Darhan Káletaevtyń sózine qaraǵanda, Qazaqstan paralımpıada sportynyń tarıhynda tuńǵysh ret halyqaralyq jarystardyń júldegerine syıaqy beriledi. Zúlfııa Ǵabıdýllına QR UPK atynan (kúmis júlde úshin 100 myń teńge, 2 qola júlde úshin 50 myń teńgeden) syıaqy alady. Olardyń jattyqtyrýshylary da syıaqyǵa ıe bolady.
