Qazaqstanda pandemııaǵa qatysty daǵdarysqa qarsy qarajattyń tıimdi ıgerilýi tekseriledi

NUR-SULTAN. QazAqparat – Parlament Májilisiniń jalpy otyrysynda Respýblıkalyq bıýdjettiń atqarylýyn baqylaý jónindegi esep komıtetiniń tóraǵasy Natalıa Godýnova pandemııamen kúreste daǵdarysqa qarsy qarajattyń tıimdi ıgerilý aýdıti qashan bolatynyn aıtty, dep habarlaıdy QazAqparat tilshisi.

Aıta keteıik, jalpy otyrysta QR Úkimetiniń jáne Respýblıkalyq bıýdjettiń atqarylýyn baqylaý jónindegi esep komıtetiniń 2020 jylǵy respýblıkalyq bıýdjettiń atqarylýy týraly esepteri qaralyp jatyr.

«Densaýlyq saqtaý mınıstrligi tarapynan pandemııamen kúreste daǵdarysqa qarsy qarajattyń ıgerilýine qatysty toqtalsaq, bul turǵyda quqyq qorǵaý organdary qujattardy tekserýge alǵan bolatyn. Protsessýaldyq is-qımyldar aıaqtalǵannan keıin, biz tıimdilik aýdıtin júrgizemiz», - dedi Natalıa Godýnova.

Onyń aıtýynsha, jumyssyzdyq deńgeıin 4,9 paıyz shamasynda saqtap qalý múmkin bolǵanymen, bastapqyda shyǵystardyń eleýli bóligi ýaqytsha jumys oryndaryn qurýǵa negizdelgen. Jumysqa ornalastyrýdyń ortasha kezeńi 1-den 3 aıǵa deıin quraǵan.

«Daǵdarysqa qarsy júzege asyrýǵa qabyldanǵan jobalardyń tek 14 paıyzy uzaq merzimdi ekonomıkalyq avtıvter men nysandardy qurýǵa baǵyttaldy. Bul turǵyda Shyǵys Qazaqstan oblysynan basqalarynda osyndaı jaǵdaı oryn aldy. Qalǵandary aǵymdaǵy jóndeý jumystary, kógaldandyrý jáne osy tektes is-sharalardy atqarǵan. Osy oraıda odan bolǵan áser qysqa merzimdi ekeni túsinikti», - dedi ol.

«Jańa óndirister qurý, qoldanystaǵy qýattardy keńeıtý boıynsha jobalar óńirler tarapynan qarjylandyrý úshin usynylmady. Alaıda Úkimet tıisti sharalardy qabyldap, qazirgi kezde memlekettik resýrstardy bosqa jumsaýǵa jol bermeıtin talaptar bekitildi», - dedi N. Godýnova.