Qazaqstanda ozyq deńgeıli jańa 6 tehnıkalyq kolledj qurylady
ASTANA. QazAqparat -Qazaqstanda ozyq deńgeıli jańa 6 tehnıkalyq kolledj qurylady. Osy arqyly elimizdiń tehnıkalyq jáne kásibı oqytý mekemelerine álemdik ozyq tájirıbeler engiziledi. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte málim boldy. Eske salaıyq, brıfıng barysynda tehnıkalyq jáne kásibı dýaldyq oqytý máseleleri talqylanǵan bolatyn.
«Búgingi álem jańa tehnologııalyq qurylymǵa bet alyp barady, osynyń ózi tehnıkalyq jáne kásibı mamandar daıarlaý júıesinde ózgeristerdi talap etedi. Al búgingi eńbek naryǵy men bilim berý salasyndaǵy oryn alǵan teńsizdikterge kelsek, bul rette jumys berýshiler túlekterdi jumys jaǵdaıyna beıimdeý kóp ýaqyt alatynyn, olardyń eńbek ónimdiliginiń tıimdiligi tym tómen ekenin aıtady. Qysqasy, tehnıkalyq jáne kásibı bilim berý júıesin bitirgender ózderiniń praktıkalyq daǵdysyn óndiristegi jumys ornyna aralasqanda ǵana jetildiredi, bul jumys berýshilerdiń talabyn qanaǵattandyrmaıdy», - dedi «Kásipqor» Holdıngi» UAQ basqarmasynyń tóraıymy Eldana Sádýaqasova.
Onyń aıtýynsha, tehnıkalyq jáne kásibı kolledjder túlekteriniń 70 paıyzynan astamy, bitirgennen keıin birneshe jyldyń ishinde ǵana jumysqa ornalasý múmkindigine ıe. Bul rette holdıng basshysy atalǵan úrdistiń tek Qazaqstanda ǵana emes, álemniń barlyq elderinde problemaǵa aınalyp otyrǵanyn málim etti.
«Dýaldyq júıeni qurý barysynda bizdiń holdıng úsh iri strategııalyq baǵytty júzege asyrmaq. Birinshisi, biz jańa kolledjder quratyn bolamyz. Qazirdiń ózinde Astana men Almaty qalalarynda álemdik deńgeıdegi eki kolledj salynyp jatyr. Budan bólek, 4 óńiraralyq ortalyqtar qurylady, onyń bireýi Atyraýda jumys istep te jatyr. Qalǵan úsh ortalyq Óskemen, Shymkent, Ekibastuzda salynyp jatyr. Biz áriptesterimiz - sheteldik oqý mekemelerimen birlese otyryp, bulardaǵy oqý baǵdarlamalarynda múldem jańa qadam jasaımyz», - dedi E. Sádýaqasova. Onyń aıtýynsha, jańa tájirıbelerdi zerdeleı otyryp, ondaı júıe qazaqstandyq kolledjderge engiziledi. Bul baǵytta oblys ortalyqtarynda ornalasqan alǵashqy on áriptes-kolledjder aıqyndalǵan.
«Osy on áripes-kolledjder arqyly biz keıinnen, jańadan salynatyn alty kolledjderge, sosyn barlyq tájirıbeni táhnıkalyq jáne kásibı bilim salasyndaǵy 278 tehnıkalyq kolledjderge engizetin bolamyz. Translıatsııa birneshe saty boıynsha júzege asady. Eń birinshi, oqytýshylardyń kásibı quramyn jańartýdan bastalady», - deıdi holdıng basshysy.
