Qazaqstanda ózińizben birge alyp júretin kofe baǵasy qansha

Qazaqstan qalalarynda jelilik jáne shaǵyn kofehanalar sany kún sanap artyp keledi. Baǵany salystyrý kezinde kólemi 0,5 ml bolatyn kapýchıno men latte tańdaldy. Kofeniń dál osy eki túriniń baǵasyn salystyrdyq.

Baǵa Almaty qalasynda tómen bolyp shyqty. Shaǵyn kofehanada latte men kapýchınony 600 teńgege satyp alýǵa bolady. Al jelilik nysandarda baǵa birshama joǵary. Orta eseppen kólemi 400 – 480 ml bolatyn eki túrli kofeni 1 190 – 1 695 teńgege satyp alýǵa bolady. Keıbir kofehanada baǵa 1 900 – 2 200 teńgege jetti. Avtorlyq jáne sapasy joǵary kofe baǵasy osyndaı.

Oral qalasynda da latte men kapýchınony 700 teńgege satyp alýǵa bolady. Kólemi 300 – 400 ml bolatyn kofeniń ortasha baǵasy qazir 1 400 – 1 600 teńge bolyp tur. Bul suranysy joǵary ári keń taralǵan túri. Al tanymal kofehana jelisindegi baǵa – 1 600 – 1 700 teńge.

Qaraǵandylyqtar latteni 750 – 1 300 teńgege, al kapýchınody 850 – 1 500 teńgege satyp ala alady. Baǵa kofeın, onyń kólemi men kofehanaǵa baılanysty ózgerip otyrady.

Jezqazǵanda latte baǵasy – 850 – 1 500 teńge, al kapýchıno – 1 000 – 1 600 teńge.

Taldyqorǵandaǵy kofehanadan kapýchıno tańdasańyz 950 – 1 150 teńge, lattege 900 – 1 150 teńge tóleısiz. Kólemi kishkentaı ekspressony 500 teńgege, eki eselep 700 teńgege satyp alýǵa bolady. Al amerıkano baǵasy – 850 – 950 teńge. Ári qaraı mokkachıno men raf baǵasyn bildik. Baǵalary orta eseppen – 1 100 – 1 300 teńge bolsa, marshmellatte nemese raf sekildi avtorlyq nusqasy – 1 200 – 1 400 teńge. Muz qosylǵan amerıkano quny 1 150 teńge bolsa, bambl nemese espresso-tonık nusqasy 1 650 teńgege saýdalanady.

Pavlodarda kofehanalarynda kapýchıno men latte baǵasy shamamen 990 – 1 490 teńge.

Qostanaıda klassıkalyq latte 990 – 1 300 teńge, kapýchıno 990 – 1 400 teńge, amerıkano 800 – 1 100 teńge, espresso 600 – 700 teńge. Al raf pen mokkachıno quny – 1 200 – 1 600 teńge.

Kókshetaýda kelýshilerge M jáne L kólemdi latte pen kapýchıno usynylady. Eki sýsynnyń klassıkalyq túrin shamamen 1 100 tg (M) jáne 1 190 tg (L) satyp alýǵa bolady. Kofege qosatyn súttiń túrine (badam, kokos) qaraı shaǵyn kólemdisi 1 390 – 1 690 teńge, úlkeni 1 500 – 1 790 teńge bolyp tur. Sonymen birge shárbat 150 teńge, kilegeı 250 teńge. Kofehana jelilerinde baǵa 990 teńgeden bastalady.

Taraz qalasynda ózińmen birge alyp júretin kofe baǵasy – 1 190 – 1 590 teńge aralyǵynda. Saýda-oıyn-saýyq ortalyqtarynda kólemi 450 ml bolatyn kofeni 1 190 teńgege satyp alýǵa bolady. Al tanymal jelilerdegi latte men kapýchıno baǵasy shamamen – 1 590 teńge. Jastar jıi baratyn «sándi» oryndarda baǵa – 1 390 teńge. Ýnıversıtet ishindegi kofehanada da kólemi 450 ml bolatyn kofe baǵasy shamamen 1 390 teńge bolyp tur. Eger sút nemese shárbatty qossańyz, ústine 500 – 600 teńge qosa eseptep beredi. Sóıtip kofe baǵasy keıde 2 490 teńgege jetedi.

Petropavlda kólemi 350 ml bolatyn kapýchınony shamamen 1 100 – 1 200 teńgege, 450 ml latteni 1 200 – 1 300 teńgege satady. Al raf baǵasy shamamen 1 600 teńge, amerıkano 1 100 teńge. Eger qalasańyz shárbat (200 tg) nemese kokos, badam, suly sútin (900 tg) qosýǵa bolady. Ekspresso men amerıkano sekildi klassıkalyq túriniń baǵasy 800 teńgeden bastalady.

Astana qalasynda ózińmen birge alyp júretin kapýchıno men latteniń ortasha baǵasy – 1 100 – 1 500 teńge. Al tanymal oryndarda kólemi, dáni men túrli qospalaryna qaraı baǵa 1 800 – 2 500 teńgege jetedi. Kofe avtomattarynda sergitkish sýsyndy 800–900 teńgege satyp alýǵa bolady.

Qonaev qalasynda kapýchıno men latteni 1 100 – 1 400 teńgege satyp alýǵa bolady. Al raf nemese avtorlyq sýsyn túrin 1 500 – 1 800 teńgege usynady. Muz qosylǵan latte men frappeniń baǵasy – 1 300 teńge jáne odan joǵary. Klassıkalyq amerıkano baǵasy shamamen – 900 – 1 200 teńge.

Aqtóbelikter úshin ózińmen birge alyp júretin kofe baǵasy – 1 100 – 1 300 teńge (latte men kapýchıno). Espresso kofesiniń baǵasy 750 – 890 teńge, amerıkano – 990 – 1 250 teńge, kapýchıno – 1 100 – 1 300 teńge (keıbirinde baǵa 1290 teńge jáne odan tómen), latte – 1 150 – 1 300 teńge (keıbirinde 1 390 teńge jáne odan tómen), flet ýaıt shamamen 1 150 – 1 390 teńge, al raf baǵasy – 1 500 – 1 590 teńge aralyǵynda.

Semeıdegi avtomattarda baǵa 700 teńgeden bastalsa, kofehanadan 1 100 – 1 200 teńgege satyp alýǵa bolady. Ári ketkende shamamen 1 500 teńge bolady.

Qyzylordada kapýchıno baǵasy 1 190 teńge, al latte 1 290 teńgeden bastalady. Túrkistanda baǵasy sál joǵary. Eki kofeniń baǵasy shamamen – 1 190 – 1 590 teńge.

Shymkent qalasynda kapýchıno baǵasy shamamen 1 100 – 2 200 teńge, latte 1 300–2 000 teńge. Baǵaǵa dán, súttiń túri, sonymen birge kofehananyń ornalasqan jeri áser etedi. Qala ortalyǵyndaǵy saýda-oıyn-saýyq ortalyqtaryndaǵy baǵa joǵary.

Aqtaýda ózińmen birge alyp júretin kofe baǵasy 1300 – 1 600 teńge aralyǵynda. Bul kólemi 0,5 l bolatyn latte men kapýchıno quny.

Óskemende eki túrli kofeniń baǵasy 1 500 teńge, al meıramhanalarda 2 000 – 2 500 teńge. Avtomattan alsańyz 800 teńge tóleısiz.

Atyraý qalasyndaǵy kofehanalar kólemi 300-400 ml bolatyn kapýchınony 1 400 – 1 600 teńgege, latteni 1500–1650 teńgege, flet ýaıtty shamamen 1290 teńgege, al rafty 1 700 – 1 800 teńgege satady. Aıs-kofe men frappýchıno baǵasy kólemi men quramyna qaraı – 1 700 – 2 850 teńge.

Buǵan deıin ulttyq táttiler baǵasy týraly jazyldy.