Qazaqstanda ózin qumar oıyndardan shektegender 170 myńnan asty
ASTANA. KAZINFORM – Týrızm jáne sport mınıstrligi Oıyn bıznesin jáne lotereıany retteý komıteti tóraǵasynyń orynbasary mindetin atqarýshy Ǵalymjan Mustafaev lýdomanııamen kúrestiń tıimdi tásilderi týraly aıtty.
- Memleket basshysy bıylǵy shilde aıynda tıisti zańǵa qol qoıdy. Halyq arasynda bul qujat «lýdomanııamen kúres týraly» zań dep atalyp ketti. Bul qujat boıynsha qoldanystaǵy 15 zańǵa jáne 8 kodekske tolyqtyrý engizildi. Osy zań normalary 9 qyrkúıekten bastap kúshine endi. Engizilgen 150 túzetýge toqtalsaq, onyń ishinde býkmekerlik keńseler men totalızatorlardyń jarnamalaryna shekteý qoıyldy. Sonymen qatar, bul zańnama aıasynda jeke adamdardyń ózin qumar oıyndar men bás tigýden shekteı alady. Buǵan deıin azamattar ózin qumar oıyndardan 6 aıdan 12 aıǵa deıingi merzimge shekteı alatyn. Endi qyrkúıekte kúshine engen normaǵa sáıkes, 21 jasqa tolǵan Qazaqstan azamaty 6 aıdan 10 jylǵa deıin osyndaı shekteýdi qoıa alady (qyzmetti eGov mobile qosymshasy arqyly paıdalanýǵa bolady), - dedi Ǵ. Mustafaev Kazinform-nyń YouTube arnasyndaǵy Bızdıñ orta podkastynda..
Onyń aıtýynsha, bul máselege qatysty zertteý barysynda halyqaralyq tájirıbeler nazarǵa alyndy. Bul rette mamandar 1 jyl ýaqytqa shekteý az ekenin aıtyp, 10 jylǵa deıingi merzim tıimdi bolatynyn usynǵan.
- «Oıyn bıznesi týraly» Zańynyń 15-1-baby boıynsha ózine shekteý qoıǵan adamnyń ótinishi keri qaıtaryp alýǵa jatpaıdy. Eger bastapqyda 10 jylǵa shekteýge kelisse, sol merzim aıaqtalǵannan keıin ǵana ýákiletti organ ony tizimnen shyǵarý týraly is-qımyldar jasaı alady, - dep túsindirdi vedomstvo ókili.
Onyń sózine qaraǵanda, ótinish bergennen keıin, qumar oıyndarǵa qatysýǵa shekteý qoıylǵan adamdar tizimine avtomatty túrde engiziledi jáne ótinish keri qaıtarylmaıdy. Buǵan deıin shekteý qoıǵandar úshin merzimdi uzartý múmkindigi de bar. Bul turǵyda naýryz aıynan beri eGov mobile qosymshasy arqyly elektrondy tártipte 170 myńnan astam ózin qumar oıyndardan shektegen.
- Atap aıtqanda, elektrondy túrde osyndaı shekteýdi engizý men býkmekerlik keńselerdi jarnamalaýǵa tosqaýyl qoıý is-sharalary eń tıimdi normalar dep sanaımyz. Bul óz kezeginde lýdomanııamen kúreske óz úlesin qosady», - dedi Ǵalymjan Mustafaev.
Eske salsaq, bıyl qyrkúıek aıynda QR Týrızm jáne sport mınıstrligi týrızm ındýstrııasy komıtetin qaıta quryp, odan qumar oıyndar men lotereıalardy retteý jónindegi komıtetti jeke shyǵardy.
Shilde aıynda Memleket basshysy «Qazaqstan Respýblıkasynyń keıbir zańnamalyq aktilerine oıyn bıznesi, lotereıa qyzmeti, densaýlyq saqtaý, memlekettik eńbek ınspektsııasy, memlekettik baqylaý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Zańyna qol qoıdy.
Zań arqyly halyqtyń oıynǵa táýeldiligin tómendetýge baǵyttalǵan shekteýshi jáne yntalandyrýshy normalar engiziledi.
Budan buryn habarlanǵandaı, lýdomanııaǵa shaldyqqandardyń tek 8,3%-y qumar oıyndarǵa táýeldiligin moıyndaıdy eken.
Osy jyly daýryz aıynda Májilis depýtaty Elnur Beısenbaev elimizde 400 myńdaı adam býkmekerler men kazınolardyń turaqty klıentine aınalǵanyn aıtty.