Qazaqstanda óziniń «911» qyzmeti paıda bolady
ASTANA. 1 naýryz. QazAqparat - QR Din isteri agenttigi janyndaǵy «Jedel jeli» qazaqstandyq «911» qyzmetine aınalady.
Bul týraly vedomstvonyń basshysy Qaırat Lama Sharıf málimdedi, dep jazdy búgingi sanynda «Almaty aqshamy» gazeti.
«Bizde áleýmettik tapsyrys bar. Onyń aıasynda biz qajetti sharalardy jasap jatyrmyz. Jedel jeli «911» amerıkalyq jelige uqsas bolmaq. Respýblıkadaǵy 28 ortalyqtyń barlyǵynda bir telefon bolýy tıis. Bizdiń din isteri boıynsha aımaqtyq departamentterimizde de osy telefondar bolady. Sol ýaqytta kez kelgen adam ózin tolǵandyrǵan saýaldardy joldap, oǵan jaýap alatyn bolady. Shamamen osy úlgide jumys atqarmaqpyz. Bul másele áli de talqylanatyn bolady», - dedi Lama Sharıf.
QR Memlekettik hatshysy Marat Tájın jýyrda aqparat aktıvimen kezdesýinde radıkaldy dinı birlestikterdi anyqtaý úshin «jedel jelini» jolǵa qoıýdy tapsyrǵan bolatyn.
Osyǵan oraı agenttik tóraǵasy «jedel jelini» bıyl iske qosý josparlanyp otyrǵanyn da atap ótti.
«Memlekettik hatshynyń tapsyrmasyna sáıkes, biz «jedel jeli» qurý boıynsha qajetti túzetýler engizetin bolamyz», - dep túıindedi sózin agenttik tóraǵasy.
