Qazaqstanda «ózin-ózi jumyspen qamtyǵandar» túsinigi naqtylanady
ASTANA. QazAqparat - QR Eńbek jáne áleýmettik qorǵaý mınıstrligi «ózin-ózi jumyspen qamtyǵandar» túsinigin naqtylaýdy josparlap otyr, dep habarlaıdy QazAqparat.
Aıta keteıik, Parlament Májilisinde «Qazaqstan Respýblıkasynyń keıbir zańnamalyq aktilerine halyqtyń jumyspen qamtylýy jáne kóshi-qony máseleleri boıynsha ózgerister men tolyqtyrýlar engizý týraly» zań jobasy tanystyrylyp, Eńbek jáne halyqty áleýmettik qorǵaý vıtse-mınıstri Birjan Nurymbetov depýtattardyń saýalyna jaýap berdi.
Onyń sózine qaraǵanda, Eńbek mınıstrligi jol kartasyn ázirlep, onyń aıasynda elde zańnamalyq turǵyda «ózin-ózi jumyspen qamtyǵan» túsinigine anyqtama berý josparlanyp otyr. Osy oraıda atalǵan sanatqa kimder jatqyzylatyny naqtylanbaq.
«Biz búginde jol kartasynda memlekettik organdarmen, qoǵamdastyqpen, depýtattarmen birlese osynyń barlyǵyna túsinik berý maqsatyn qoıyp otyrmyz. Bul turǵyda olardy qandaı da bir sanatqa bólý múmkindigi eskerilgen. Múmkin tirkelip jumys istegender kásipker atansa, al qalǵandary ózin-ózin jumyspen qamtyǵandar sanatyna jatqyzylsa. Bizde 600 myńnan astam adam jeke úı sharýashylyǵynda júr. Bizge olar nemen aınalysyp júrgenin túsinip alý kerek, ıaǵnı bul adamdar ónimderin sata ma nemese tek ózderi úshin ǵana kartop ósire me?» - dep toqtaldy ol.
Belgili bolǵandaı, jol kartasyn qabyldap, zańnamaǵa ózgeristerdi 2018 jyldyń birinshi jartyjyldyǵynda usyný josparlanyp otyr.
Nurymbetovtiń atap ótýinshe, memlekettik organdardyń aqparattyq júıeleri málimetine qaraǵanda, 5,5 mıllıon adamnyń mártebesi anyqtalmaǵan. Eńbek mınıstrliginiń úı-úıdi aralaý saýalnamasy nátıjesinde, elde 2,7 mıllıonǵa tarta adam resmı emes jumys istep júrgeni anyqtaldy.
