Qazaqstanda ózimdi orys jerinde júrgendeı bolyp sezindim - sheteldegi qandasymyzdyń Elbasyǵa joldaǵan hatynan
ASTANA. Qazannyń 30-y. QazAqparat /Arman Asqarov/ - Qazaqstandy aralap shyqqannan keıin ózimdi orys jerinde júrgendeı bolyp sezindim. Qazaqstannyń táýelsizdik alǵanyna 20 jyl tolsa da, jergilikti ult ókilderi áli kúnge deıin óz tilinde sóıleı almaýda. Osyǵan túsinikteme berip ótseńiz?
Elbasy Nursultan Nazarbaevtyń tikeleı jeli arqyly qazaqstandyqtardyń saýaldaryna jaýap berýine baılanysty Beıbitshilik jáne kelisim saraıynda ashylǵan Baılanys ortalyǵyna Mońǵolııadaǵy qandasymyz Dosjan Qabylulynan osyndaı saýal tústi, dep habarlaıdy QazAqparat.
«...Ótken qyrkúıek aıynda men halqymyzdyń atamekeni - Qazaqstanǵa issaparmen baryp qaıtqan edim. Semeı, Kókshetaý, Almaty, Qaraǵandy, Taldyqorǵan sııaqty qalalarda bolyp, kezdesken adamdardan birdeńe suraǵan kezde, barlyǵy oryssha jaýap beredi. Qazaq bola tura, oryssha sóılep tur. Shynymdy aıtsam, men ózimdi orys jerinde júrgendeı bolyp sezindim. «Til túzelmeı, el túzelmeıdi» demekshi, Qazaqstannyń táýelsizdik alǵanyna 20 jyl tolsa da, jergilikti ult ókilderi áli kúnge deıin óz tilinde sóıleı almaýda. Árıne, osynyń bári memlekettik saıasatqa da tikeleı baılanysty bolýy kerek. Osyǵan túsinikteme berip ótseńiz?» delingen D.Qabylulynyń hatynda.
Aıta keteıik, qarashanyń 13-i kúni Elbasy Nursultan Nazarbaev «Qazaqstan», «Habar», «Astana qalalyq teledıdary» telearnalary jáne «Qazaq radıosy», «Astana qalalyq radıosy» radıolary boıynsha ótetin tikeleı efırde azamattardyń teleefır, telefon, ınternet jáne SMS habarlamalary arqyly túsken suraqtaryna jaýap beretin bolady. Osy ýaqytqa deıin Prezıdenttiń atyna 31 suraq kelip tústi.
