Qazaqstanda ózge ulttardyń óz ana tilderin oqýyna tolyq jaǵdaı jasalǵan - Til komıteti
Bul týraly búgin Halyqaralyq ana tili kúnine oraı ótkizilgen dóńgelek ústel otyrysy barysynda QR Mádenıet jáne aqparat mınıstrligi Til komıtetiniń tóraǵasy Sherýbaı Qurmanbaıuly málim etti.
«Búgin - Halyqaralyq ana tili kúni. Bul kún 1999 jylǵy qarashada ıÝNESKO-nyń Bas konferentsııasy 30-sessııasynyń sheshimimen bekitilgen jáne 2000 jylǵy 21 aqpannan bastap tildik jáne mádenı áralýandyqty qorǵaý maqsatynda atap ótiledi», - dedi ol.
Onyń aıtýynsha, Qazaqstan ishki jáne syrtqy qarym-qatynastaǵy sarabdal saıasatynyń arqasynda eshbir ulys ókilin syrtqa qaqpaı, onyń óz tilin úırenip, salt-dástúrin saqtaýyna úlken qoldaý kórsetip otyr.
Máselen, ózge ulys ókilderi qazir 11 tilde gazet-jýrnaldardy, 8 tilde radıohabarlary men 7 tilde telehabarlardy taratyp otyr. Qazaq, orys ulttaryn eseptemegende ózbek, tájik, uıǵyr, ýkraın tilinde 88 mektep jumys jasaıdy. 108 mektepte 22 etnostyń tili derbes pán retinde oqytylady. Al mamandandyrylǵan lıngvıstıkalyq 195 ortalyqta 30 etnostyń 7 myńnan astam ókiline ana tilin úırenýine jaǵdaı jasalǵan. Sondaı-aq ózbek, uıǵyr, káris, nemis teatrlary jumys jasaıdy. Onyń ishinde uıǵyr, káris, nemis teatrlary burynǵy keńestik keńistiktegi ózge eshbir elde joq birden-bir mádenıet oshaqtary sanalady.
