Qazaqstanda «ózbek úlgisi» negizinde sharýashylyq pen aǵash ósirý damytylmaq – sheteldegi qazaq baspasózi
Qazaqstanda «ózbek úlgisi» negizinde pillá sharýashylyǵy men tut aǵashyn ósirý damytylmaq - «ÓzA»
Qazaqstan Respýblıkasyndaǵy «Qazaqjibekóndiris» birlestiginiń basshysy Sultan Bákirov bastaǵan Túrkistan oblysynyń aýdan ákimderi men bir top kásipkerden quralǵan delegatsııa Ándijan oblysy «Jibek kóshet» klasterinde boldy, dep habarlaıdy «ÓzA» aqparat agenttigi.
Ózbekstandyq BAQ-tyń málimetinshe, qonaqtar munda tut aǵashy men jibek sharýashylyǵynyń «ózbek úlgisin» Qazaqstanda tájirıbede qoldaný, yntymaqtasa tut plantatsııalaryn qurý, jibek ósirý dástúrin qalpyna keltirý maqsatynda kelgen.
«Sapar barysynda «Ózbekıpaksanoat» birlestigimen aldaǵy ýaqyttaǵy yntymaqtastyq máselelerin, jibek qurtyn ósirýdiń zamanaýı ádisterin engizýge sarapshylar tobyn tartý qarastyrylǵan», dep jazady «ÓzA».
Qazaqstan naryǵynda Qytaı avtomobılderiniń sany artyp keledi – «Halyq» gazeti
Qytaılyq avtomobılder Qazaqstan naryǵynda kóbeıip keledi.
«Halyq» gazeti bul aqparatty «Inbusiness.kz»-ke silteme jasap habarlaǵan. Qytaılyq BAQ-tyń dereginshe, statıstıka muny rastap otyr. Sebebi bıyldyń alǵashqy bes aıynda Qazaqstan Qytaıdan 16 333 avtomobıl ımporttady. Bul 2022 jylmen (12 500) salystyrǵanda áldeqaıda kóp.
«Osydan Qytaı qazir qazaqstandyq avtomobıl naryǵynyń negizgi jetkizýshi eline aınalǵanyn baıqaýǵa bolady», dep jazǵan «Halyq» gazeti.
Áıgili akter Krıstıan Beıl batys Mońǵolııaǵa saıahattady – «Kaznews»
Áıgili akter Krıstıan Beıl shilde aıynda batys Mońǵolııada saıahattap, kóshpendilerdiń salt-dástúrimen tanysyp qaıtty, dep jazady mońǵolııalyq «Kaznews».
Mońǵolııalyq basylymnyń dereginshe, Krıstıan Charlz Fılıp Beıl (Christian Charles Philip Bale, 1974 jyly Ulybrıtanııa týǵan) – aǵylshyn akteri. Alǵashqy kınokarerasyn táýelsiz shaǵyn jobalardan bastaǵan.
Beıl 13 jasynda Stıven Spılbergtiń «Kún ımperııasy» fılminde oınaǵan rólinde alǵash ret kórermen kózine túsken. 2000 jyly «Amerıkalyq esalań» kartınasynda qanisher Patrık Betmendi somdaǵanda kıno synshylar nazaryna ilikti.
Aıta keteıik, Krıstıan Beıl Krıstofer Nolan rejısserlik etken «Betmen: Bastama», «Qara seri» jáne «Qara seri: Jandaný» trılogııasynda Brıýs Ýeın/Betmendi oınaǵannan keıin kópshilikke tanyla bastaǵan. Beıl synshylardan jaqsy baǵa alyp jáne birneshe marapattarǵa ıe boldy, sonyń ishinde birinshi ret «Ekinshi plandaǵy úzdik er adam róli» nomınatsııasy boıynsha Oskar jáne Altyn globýs syılyqtarynyń ıegeri atandy. Sondaı-aq «Ekinshi plandaǵy úzdik er adam róli» úshin AQSh Gıldııa kınoakterler syılyǵymen marapattalǵan.
2013 jyly «Amerıkalyq sergeldeń» dramalyq komedııasynda oınady, sol úshin Beıl ekinshi ret Oskar nomınatsııasyna ilikti.
Sondaı-aq osy aptada «Kaznews» «Shilde aıynda Mońǵolııaǵa 76,559 týrıst kelgen» degen aqparat jarııalady.
Bıyl Mońǵolııa 1 mln týrıst qabyldaýdy josparlaǵan. 2023 jyldyń jeti aıynda Mońǵolııaǵa demalýǵa 325,174 týrıst kelgen.
Mońǵolııalyq BAQ-tyń dereginshe, Qazaqstan, Reseı, Ońtústik Koreıa, Qytaı jáne Japonııa azamattary qańtar aıynan bastap Mońǵolııaǵa kelgen TOP -5 memleket týrısteri qataryna engen.
Ankara qalasynda qazaq sheberleriniń kórmesi ashyldy – «TRT»
Túrkııanyń astanasy Ankara qalasynda qazaq kórmesi ashyldy. Atalǵan kórmede Astana, Almaty jáne Taldyqorǵan qalalarynan qatysqan qolóner sheberleri óz buıymdaryn tanystyrdy.
Bul týraly osy aptada Túrkııa Radıo Televızııa portaly habarlady.
Túrkııalyq BAQ-tyń málimetinshe, kórmeni Qazaqstan elshiligi, Halyqaralyq Túriksoı uıymy, «Kók Tý» Qazaq mádenıeti qoǵamy men Dúnıejúzi qazaqtarynyń damý qory birigip ótkizgen.
Aıta ketý kerek, «Qazaq qolónershileriniń kórmesi» Túrkııa Respýblıkasynyń 100 jyldyǵyna jáne Túriksoı-dyń 30 jyldyǵyna, qazaqtyń belgili zııalysy Temirbek Júrgenovtiń 125 jyldyǵyna, sonymen birge Túrkııa men Qazaqstan memleketteri arasyndaǵy yntymaqtastyqtyń 31 jyldyǵyna oraı uıymdastyrylǵan bolatyn.
Sonymen qatar osy aptada Túrkııa Radıo Televızııa portalynda «Ankarada qazaq mýltfılmi» degen taqyryptaǵy aqparat jarııalandy.
Atalǵan basylymnyń dereginshe, bul mádenı shara Túrkııa Respýblıkasynyń qurylǵanyna jáne qazaq anımatsııalyq kıno óneriniń negizin qalaýshy rejısser, sýretshi, stsenarıst Ámen Qaıdardyń týǵanyna 100 jyl tolýyna oraı Ankarada ótkizilgen.
Іs-sharany «Qazaqanımatsııa» shyǵarmashylyq birlestigi, Qazaqstan elshiligi men Túrki tarıhy jáne mádenıeti qory birlese uıymdastyrǵan.
Bul joly Ámen Qaıdardyń «Qarlyǵashtyń quıryǵy nege aıyr?» jáne shákirtteriniń 4 týyndysy kishkentaı kórermenge usynyldy.
«Sharaǵa Túrkııanyń bas qalasynda turatyn qazaq aǵaıyndar balalarymen birge keldi. Jas kórermender men olardyń ata-analary qazaq mýltfılmderine qyzyǵýshylyq tanytty», dep túıindeıdi túrkııalyq basylym.
«Koreı tolqyny» Mońǵolııaǵa aǵylýda – «Kaznews»
Koreı pop-mýzykasy, teleserıaldary men fılmderi beınelengen «koreı tolqyny» mádenıeti sońǵy 20 jylda Mońǵolııadaǵy kóptegen jas jankúıerdiń belsendi qoldaýyna ıe boldy, dep jazady «Kaznews».
Atalǵan basylymnyń málimetinshe, Mońǵol telearnalarynda tól baǵdarlamalar az, al qalǵan ýaqyttyń basym bóliginde satyp alynǵan koreı telehıkaıalary men fılmder kórsetiledi. Osydan Koreıa juldyzdarynyń Mońǵolııada tanymaldylyǵy artqan.
«Búgingi tańda jankúıerlerdiń adal qoldaýyna ıe bolǵan koreıalyq juldyzdar Mońǵolııaǵa jıi saıahattap kelýde. Bul Mońǵolııa úshin tegin jarnama bolmaq. Óıtkeni koreıalyq juldyzdardyń áleýmettik jelide mıllıondaǵan jazylýshylary bar», deıdi mońǵolııalyq BAQ.
Astana qalasynda Álisher Naýaı músini ornatyldy - «ÓzA»
Ózbekstan óner akademııasynyń habarlaýynsha, 2022 jylǵy 29 shildede Tashkentte Ózbekstan men Qazaqstannyń syrtqy ister mınıstrleri «Ózbekstan Respýblıkasy men Qazaqstan Respýblıkasy arasyndaǵy dıplomatııalyq qarym-qatynastyń ornaǵanyna 30 jyl tolýyn keńinen atap ótý jónindegi birlesken is-sharalar josparyn» ázirlep, bekitken.
Osy birlesken jospar boıynsha Qazaqstan Respýblıkasynyń bas qalasy Astana qalasynda sóz zergeri Álisher Naýaıdiń músinin ornatý kózdelgen bolatyn, dep jazady «ÓzA».
Ózbekstandyq basylymnyń keltirgen málimetine súıensek, 2022 jyldyń 20 jeltoqsanynda bul tapsyrmaǵa baılanysty Ózbekstan Respýblıkasy Mınıstrler kabınetiniń tıisti qaýlysy qabyldanyp, Ózbekstan Kórkemsýret akademııasyna qola músindi jasap, mejeli jerge jetkizý mindeti júktelgen.
Kúni keshe Astana qalasynda uly oıshyl Álisher Naýaıdiń músini ornatyldy.
Aıta ketý kerek, bıiktigi tórt metrden asatyn bul eskertkishtiń Ózbekstannyń halyq sýretshisi, músinshi Jasvant Annazarov jasaǵan.
«ÓzA»-nyń dereginshe, Álisher Naýaı músini buǵan deıin Tokıo, Shanhaı, Vashıngton, Máskeý, Mınsk, Baký, Mazarı-Sharıf, Osh, Dýshanbe, Seýl qalalarynda ornatylǵan.
