Qazaqstanda ótken jyly 906 myń tonna armatýra shyǵaryldy

ASTANA. QazAqparat – Armatýra óndirisin jolǵa qoıǵan jańa otandyq kásiporyn ımport úlesin 47%-ǵa azaıtýǵa múmkindik beredi, dep habarlaıdy QazAqparat Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.

Indýstrııa jáne ınfraqurylymdyq damý mınıstrliginiń qoldaýymen «Taraz armatýra zaýyty» JShS Jambyl oblysynda eýropalyq sapaǵa saı armatýra óndirisin iske qosty. Zaýyt tolyq qýatyna shyqqan boıda jylyna 350 myń tonna ónim shyǵarýdy kózdep otyr.

Kásiporynda A-500 sanatyna sáıkes joǵary sapaly armatýrany daıyndaýǵa qaýqarly tyń tehnologııaǵa negizdelgen avtomattandyrylǵan ıleý jelisi iske qosylyp, óndiris kórsetkishteri jaqsaryp keledi. Osy arqyly ımportty almastyryp, shetelge eksport úlesin arttyrý josparlanǵan. Jańa óndiristiń ashylýy qosymsha 90 adamdy jumyspen qamtyp, otandyq qurylys materıaldary naryǵynda jergilikti úlestiń kólemin ulǵaıtýǵa septigin tıgizedi.

Vedomstvo otandyq metallýrgııalyq kásiporyndardy qara, tústi metaldardyń synyqtary jáne qaldyqtarymen tolyqqandy qamtamasyz etý boıynsha jumysty jalǵastyryp keledi.

Osy rette keıingi 3 jylda elimizde armatýra óndirisinde oń dınamıka baıqalyp kele jatqanyn aıta ketý kerek. Máselen, 2022 jyldyń qorytyndysy boıynsha Qazaqstanda 900 myń tonnadan artyq ónim óndirilip, onyń ishinde eksportqa 220 myń tonnaǵa jýyq armatýra jiberilgen.

Sonymen birge, elimizge 700 myń tonnaǵa jýyq ónim ákelinipti. Osyny eskere otyryp, Taraz armatýra zaýytynyń óndiristik múmkindikteri aldaǵy ýaqytta ımport kólemin 47%-ǵa azaıtýǵa septigin tıgizedi degen jospar bar.