Qazaqstanda ótken jylǵa qaraǵanda 10 myń kólik artyq óndirildi - QABQ
ASTANA. QazAqparat - Qazaqstanda otandyq óndiristegi avtokólikterge degen suranys joǵary deńgeıde saqtalyp otyr, dep habarlaıdy QazAqparat tilshisi Qazaqstandyq avtobıznes qaýymdastyǵyna (QABQ) silteme jasap.
Qaýymdastyqtyń málimetinshe, otandyq avtoóndirýshiler qazan aıynda 3 188 ártúrli markadaǵy avtokólik men tehnıkany satýǵa shyǵarǵan. Bul kórsetkish - ótken jyldyń sáıkes kezeńimen salystyrǵanda eki ese kóp.
«2018 jyldyń qańtar-qazan aılarynda Qazaqstanda barlyq tıptegi 25 879 kólik (ótken jyldyń on aıynda 15 051) óndirildi. Dástúrli túrde ósimdi jeńil avtokólikter kórsetse (24 115, ósim 86 paıyz), olarmen birge 10 aıdyń ishinde 882 aýyr júk kóligi (-21 paıyz), 448 tirkeme men jartylaı tirkeme (+106 paıyz), 249 avtobýs (-54 paıyz) pen 163 arnaıy tehnıka túri (-13 paıyz) óndirilgen», - delingen habarlamada.
Aldyna ala berilip otyrǵan aqparatqa sáıkes, qostanaılyq «SaryarkaAvtoProm» 10 aıdyń ishinde 9 321 jeńil avtokólik, aýyr júk kóligi men avtobýs qurastyryp, 132 paıyzdyq ósimge qol jetkizgen. Al Óskemendegi «Azııa Avto» kásipornynda qańtar-qazan aılarynda 15 012 avto (+60 paıyz) qurastyrylǵan. Sonymen birge Kókshetaýdaǵy «KaMAZ Injınırıng» 440 júk kóligin, semeılik SemAZ 271 júk kóligin, almatylyq HyundaiTrans Auto 194 tehnıka, al Daewoo Bus - 117 avtobýs shyǵarǵan.
«Brendter turǵysynan Hyundai aıtarlyqtaı ósimdi kórsetti. Atalmysh marka boıynsha «SaryarkaAvtoProm» kásipornynda 6 972 avtokólik qurastyrylyp, ótken jylǵydan qaraǵanda 5 ese kóp ósimge qol jetkizilgen. Sondaı-aq, Kia (2 526) kólikteriniń óndirisi 3 esege artyp, qostanaılyq JAC markaly kólikter de (1 144 avto) eki ese kóp shyǵarylǵan. Chevrolet markaly kólikter de eki ese kóp qurastyrylsa, (2017 jyly - 481, 2018 jyly 1050), «Azııa Avto» shyǵaratyn Lada 11 244 danaǵa jetip 35 paıyzǵa ósken», - delingen habarlamada.
