Qazaqstanda ótken jyly 162 jańa mektep salyndy
ASTANA. KAZINFORM – 2025 jyldyń qorytyndysy boıynsha elimizde 236 myńǵa jýyq oqýshy ornyna arnalǵan 162 mekteptiń qurylysy aıaqtaldy, onyń ishinde 112 mektep «Keleshek mektepteri» ulttyq jobasy aıasynda iske qosyldy. Bul týraly Oqý-aǵartý mınıstrliginiń baspasóz qyzmeti habarlady.
Bul bilim berý uıymdary 27 úshaýysymdy jáne 11 apatty mektep máselesin sheshýge, sondaı-aq 160 myń oqýshy ornynyń jetispeýshiligin joıýǵa múmkindik berdi. Bul maqsatta bıýdjet qarajaty esebinen jáne ınvestıtsııalar tarta otyryp júıeli jumystar júrgizilip jatyr.
El tarıhyndaǵy eń mańyzdy jobalardyń biri – Memleket basshysynyń bastamasymen júzege asyrylǵan «Keleshek mektepteri» ulttyq jobasy. Onyń aıasynda 206 myń oqýshy ornyna arnalǵan 112 jańa formattaǵy mektep qoddanysqa berildi, onyń 40%-dan astamy aýyldyq jerlerde ornalasqan. Eske sala keteıik, 2024 jyldyń qorytyndysy boıynsha 254 myń oqýshyǵa arnalǵan 105 mektep paıdalanýǵa berildi.
Qazirgi tańda bilim berý ınfraqurylymyn qoldaý qory esebinen 89 myń oqýshyǵa arnalǵan 81 mektep salyndy. Onyń ishinde 2025 jyldyń qorytyndysy boıynsha 13 myń oqýshy ornyna arnalǵan 18 jańa mektep iske qosyldy. Bul sharalar elimizdiń bilim berý júıesin uzaqmerzimdi damytýǵa jáne jańǵyrtýǵa baǵyttalǵan.
Sondaı-aq Memleket basshysynyń tapsyrmasymen qaıtarylǵan aktıvter esebinen Ulytaý oblysynyń Qarajal qalasy men Mańdyraı stantsııasynda eki mektep, Soltústik Qazaqstan oblysynda bir balabaqsha salyndy.
Eske salaıyq, Arnaıy memlekettik qor qarajaty esebinen 8 bilim berý nysany qarjylandyryldy, onyń ishinde 5 mektep, 2 balabaqsha jáne 1 jataqhana bar.
Qosymsha respýblıkalyq jáne jergilikti bıýdjet qarajaty men jeke ınvestıtsııalar tartý esebinen 16 myń oqýshy ornyna arnalǵan 30 mekteptiń qurylysy júrgizildi.
Sonymen qatar qoldanystaǵy ınfraqurylymdy jaqsartý boıynsha da aýqymdy jumystar júrgizildi:
• renovatsııa baǵdarlamasy aıasynda 209 mektep jańartyldy;
• zamanaýı standarttarǵa sáıkes 1 myń aýyl mektebi jańǵyrtyldy;
• aýyl mektepteri úshin 1196 zamanaýı pán kabıneti satyp alyndy.
Aıta keteıik, jańa nysandardy paıdalanýǵa berýdiń nátıjesinde Astana, Almaty, Shymkent qalalarynda, sondaı-aq Qaraǵandy jáne Qyzylorda oblystarynda úshaýysymdy oqytý máselesi tolyǵymen joıyldy.
Budan buryn Almaty mektepterinde elektrondy kúndelik qalaı aýysqanyn jazǵanbyz.