Qazaqstanda ótken hakaton jas IT mamandarǵa jańa serpin berdi
ASTANA. KAZINFORM – Qazaqstannyń jas IT mamandary men tehnologııalyq qoǵamdastyǵy álemdik rekord ornatty. Astanada ótken "AI Month" aıasynda HackAlem AI hakatony qatysýshylar sany boıynsha resmı túrde Álemdik Gınnestiń rekordttar kitabyna endi.
Buǵan deıingi rekord byltyr jeltoqsanda Úndistanda Google kompanııasy uıymdastyrǵan hakatonda ornatylyp, oǵan 2 089 adam qatysqan bolatyn. Al Astanadaǵy hakatonǵa qatysqan 2 415 jas maman men stýdent bul kórsetkishten asyp túsip, elimizdiń tehnologııalyq áleýetin búkil álemge pash etti. GUINNESS WORLD RECORDS resmı tóreshisi Glenn Pollard nátıjeni resmı túrde jarııalady.
Bul týraly Astana Hub Keńes múshesi — Aıdana Qasqyrbek Jibek Joly telearnasynyń «Búgin.LIVE» baǵdarlamasynda aıtty.
Elde jasandy ıntellekt baǵytyndaǵy hakatondar birneshe jyldan beri turaqty ótkizilip keledi eken.
- Rekordty shara bir kúnde uıymdastyrylǵan joba emes. Oǵan deıin úsh jyl boıy elimizdiń ár óńirinde hakatondar ótkizilip, jas IT mamandardyń tájirıbe jınaýyna jaǵdaı jasalǵan. Bul óte aýqymdy is-shara boldy. Mundaı sharalar bir rettik joba emes. Oǵan deıin úsh jyl boıy elimizdiń ár óńirinde hakatondar ótkizip keldik. Osy ýaqyt ishinde Qazaqstanda hakaton mádenıeti qalyptasty. Sondyqtan bul rekordty ornatýǵa shamamyz jetti dep aıta alamyn, — dedi ol.
Іs-sharaǵa qatysýshylardyń basym bóligi Qazaqstannan kelgen. Sonymen qatar 21 memleketten qatysýshylar tirkelgen. Uıymdastyrýshylar bul kórsetkish jastardyń, ásirese IT salasy mamandarynyń jasandy ıntellektke degen qyzyǵýshylyǵy joǵary ekenin kórsetetinin atap ótti.
- Gınnestiń rekordyn ornatý úshin qatysýshylarǵa qoıylatyn talaptar da joǵary bolǵan. Daıyndyqpen qatar, belgilengen qatań erejelerdi saqtaý qajet edi. Gınnestiń rekordyna ený ońaı emes. Bul biz úshin úlken jaýapkershilik boldy. Ýaıym da boldy. Logıstıka jaǵynan da kóptegen qıyndyq kezdesti. Biraq bul rekord Qazaqstandaǵy adamı kapıtaldyń joǵary áleýetin kórsetti, — dedi Aıdana Qasqyrbek.
Sharadan keıin halyqaralyq iri kompanııalardyń hakatondarǵa qyzyǵýshylyǵy artqany baıqalǵan. Sonymen birge jas IT mamandaryna qoldaý kórsetýge nıetti demeýshilerden de usynystar túsken.
- Álemdik iri kompanııalardyń hakatondarǵa degen qyzyǵýshylyǵy artty. Jas mamandarǵa degen kózqaras ta ózgerdi. Bizge demeýshi bolǵysy keletin, jastardy qoldaýǵa nıetti jandardan kóptegen usynys tústi, — dedi spıker.
Uıymdastyrýshylardy qatysýshylardyń jobalaryn ári qaraı damytýǵa degen yntasy da qýantqan.
- Eń qýantatyny — qatysýshylardyń ózderi ázirlegen jobalardy ári qaraı damytqysy keletinin aıtyp, úlken talpynys tanytýy. Jastarǵa mamandar tarapynan qoldaý kórsetildi. ıAǵnı bul sharada san da, sapa da boldy, — dedi ol.
Aıta keteıik, jaqynda astanalyq 4 pedagog halyqaralyq hakaton jeńimpazy atandy.
