Qazaqstanda ótken Bolashaq oıyndaryn 200 mln-nan astam adam tamashalady
ASTANA. KAZINFORM — «Bolashaq oıyndary 2026» halyqaralyq týrnıri Qazaqstannyń ulttyq qundylyqtary men zamanaýı tehnologııalyq áleýetin álemge tanytýǵa múmkindik berdi.
Bul týraly QR Týrızm jáne sport mınıstrliginiń resmı ókili Meıramǵazy Saparǵalıev Jibek Joly telearnasyndaǵy «Búgin LIVE» baǵdarlamasynda aıtty.
Onyń aıtýynsha, halyqaralyq dodaǵa álemniń myqty komandalary qatysyp, jarysqa jahandyq deńgeıde qyzyǵýshylyq artqan.
— Búkil jahan nazary Qazaqstanda boldy. Oıyndardyń barlyǵy tikeleı efırde kórsetilip, 16 tilge aýdaryldy. Osy turǵydan alǵanda, biz álemge ulttyq qundylyqtarymyzdy da, zamanaýı tehnologııalyq damýymyzdy da teń dárejede kórsete aldyq, — dedi Meıramǵazy Saparǵalıev.
Mınıstrlik ókiliniń sózinshe, jarysqa kelgen sheteldik sportshylar men qonaqtarǵa Qazaqstannyń ulttyq mádenıeti tanystyryldy.
— Meniń esimde qalǵan erekshe sátterdiń biri — komandalardyń bizdiń ulttyq kıimderimizge qyzyǵýshylyq tanytýy. Olar ulttyq naqyshtardy qaıdan alýǵa bolatynyn surady. Keıbir sportshylar jarys kezinde qazaqtyń ulttyq taqııasyn kıip júrdi. Sonymen qatar oıý-órnek elementterin ózderimen birge alyp kelgen qurylǵylaryna taqqanyn kórdik. Bul bizdiń mádenıetimizge degen úlken qurmet, — dedi ol.
Maman fıdjıtal sporttyń damý perspektıvasyna da nazar aýdardy. Onyń pikirinshe, tsıfrlyq tehnologııalardyń qarqyndy damýyna baılanysty Qazaqstan bul baǵyttaǵy halyqaralyq básekeden qalyspaýy kerek.
— Sport bir orynda turaqtap turmaıdy. Bul jerde kıbersport pen fıdjıtal sport toǵysyp otyr. Qarjylyq áleýet pen tsıfrlyq tehnologııalarǵa úlken kóńil bólinip jatqandyqtan, biz básekelestikten qalyspaýymyz kerek, — dedi ol.
Meıramǵazy Saparǵalıev jastardyń kıbersportty tek oıyn retinde qabyldamaı, onyń tehnologııalyq qyrlaryn da meńgerýi mańyzdy ekenin atap ótti.
— Jastar ony jaı ǵana oınap qoımaı, oıyndy ári qaraı damytý strategııasyn qalyptastyra bilýi kerek. Onyń ishki qurylymyn, fýnktsıonalyn zertteýi qajet. Osy turǵydan alǵanda, bul joba jastardyń qyzyǵýshylyǵyn arttyrýǵa múmkindik beredi. Aldaǵy ýaqytta olar osy tehnologııalardy zerttep, elimizde álemdik básekege qabiletti baǵdarlamalar men oıyndar jasaı alsa, bul úlken jetistik, — dedi mınıstrlik ókili.
Sonymen qatar ol týrnırdiń kórermender sanyna qatysty aldyn ala málimet berdi.
— Qazir naqty sanyn aıta almaımyn. Tústen keıin tolyq statıstıkalyq aqparat belgili bolady. Sonyń ózinde, týrnırdi 200 mıllıonnan astam adam tamashalady dep aıta alamyz. Alǵashqy kúnderdegi aǵyndy eseptegende, 400 myńnan asady dep boljaǵanbyz, — dep túıindedi Meıramǵazy Saparǵalıev.
Aıta keteıik, Astanada halyqaralyq «Bolashaq oıyndary — 2026» týrnıri aıaqtaldy. On kún boıy elorda fıdjıtal sporttyń álemdik ortalyǵyna aınalyp, tsıfrlyq tehnologııalar men dástúrli sportty biriktirgen jarystarǵa myńdaǵan jankúıer kýá boldy.
