Qazaqstanda ótken aptada bolǵan kadrlyq taǵaıyndaýlar
ASTANA. KAZINFORM – Ótken aptada elimizde birqatar kadrlyq aýys-túıis boldy.
Atap aıtqanda, Prezıdent Jarlyǵymen Nurdáýlet Igilikuly Qılybaı Mańǵystaý oblysynyń ákimi bolyp taǵaıyndaldy.
Nurdáýlet Qılybaı 1978 jyly Mańǵystaý oblysy Beıneý aýdanynda dúnıege kelgen. Bilimi joǵary. «Tasymaldaýdy uıymdastyrý jónindegi ınjener», «Qarjy jáne qarjy quqyǵy» mamany. 2018 jyly AQSh-tyń Boston qalasynda Stafford House halyqaralyq mektebinde bilim alǵan.
Eńbek jolyn 1999 jyly Mańǵystaý tasymaldaý bólimshesi stantsııasynyń kezekshisi qyzmetinen bastaǵan. Keıin Astana stantsııasynda kirme joldary boıynsha júkterdi qabyldap-tapsyrýshy, «QTJ» UK» aktsıonerlik qoǵamynynyń bas mamany, bólim bastyǵy, magıstraldy jeliler dırektsııasy basqarýshysynyń kómekshisi qyzmetterinde boldy. 2005-2009 jyldar aralyǵynda Qazaqstan Respýblıkasy Kólik jáne kommýnıkatsııalar mınıstrligi Kólik jáne qatynas joldary komıtetiniń bólim bastyǵy, basqarma bastyǵy, tóraǵanyń orynbasary qyzmetin atqarǵan.
2009-2010 jyldary «Vokzal-servıs» AQ prezıdenti, «QTJ» UK» AQ Jolaýshylardy tasymaldaý jónindegi basqarýshy dırektory boldy. 2010-2011 jyldary Qazaqstan Respýblıkasy Kólik jáne kommýnıkatsııalar mınıstrligi Kólik jáne qatynas joldary komıtetiniń tóraǵasy qyzmetin atqardy. 2011-2012 jyldar aralyǵynda «QTJ» UK» AQ prezıdentiniń keńesshisi, keıin osy aktsıonerlik qoǵamnyń Mańǵystaý joldary bólimshesi fılıalynyń dırektory boldy.
2012-2013 jyldary Qazaqstan Respýblıkasy Kólik jáne kommýnıkatsııalar mınıstrligi Kólik jáne qatynas joldary komıtetiniń tóraǵasy qyzmetinde boldy. 2013-2017 jyldary «QTJ» UK» AQ apparat basshysy - atqarýshy dırektory, «QTJ» UK» AQ atqarýshy dırektory - «Jolaýshylar tasymaldaý» AQ prezıdenti, «Temirjolsý» AQ Bas dırektory - Basqarma tóraǵasy qyzmetin atqardy. 2018-2020 jyldary – Mańǵystaý oblysy ákiminiń orynbasary. 2020 jyldyń maýsym aıynan bastap Aqtaý qalasynyń ákimi laýazymynda boldy.
2022 jyldyń qazan aıynan búginge deıin Mańǵystaý oblysy ákiminiń orynbasary qyzmetin atqardy. 2023 jylǵy 25 qańtarda «Ózenmunaıgaz» AQ bas dırektory bolyp taǵaıyndalǵan edi.
Memleket basshysynyń Jarlyǵymen Tımýr Qaldybaıuly Tilegenov Halyqaralyq azamattyq avıatsııa uıymy janyndaǵy Qazaqstan Respýblıkasynyń Turaqty ókili laýazymyna taǵaıyndaldy.
Tımýr Tilegenov 1988 jyly 20 naýryzda dúnıege kelgen. 2021 jyly Frantsııanyń Ulttyq azamattyq avıatsııa mektebin (ENAC) «Áýe kóligin basqarý» mamandyǵy boıynsha, 2014 jyly Qazaqstan Respýblıkasy Prezıdentiniń janyndaǵy Memlekettik basqarý Akademııasyn «Halyqaralyq qatynastar» mamandyǵy boıynsha, 2009 jyly L. N. Gýmılev atyndaǵy Eýrazııa ulttyq ýnıversıtetin «Halyqaralyq qatynastar» mamandyǵy boıynsha úzdik bitirdi.
2009 jylǵy qazannan 2019 jylǵy qazanǵa deıin Qazaqstan Respýblıkasy Kólik jáne kommýnıkatsııalar mınıstrliginiń Azamattyq avıatsııa komıtetinde sarapshy, bas sarapshy, bas sarapshy – halyqaralyq qatynastar jáne avıatsııalyq tasymaldar basqarmasynyń aǵa memlekettik avıatsııa ınspektory laýazymdarynda jumys istedi.
2019 jylǵy qazannan 2022 jylǵy qańtarǵa deıin Qazaqstan Respýblıkasy Indýstrııa jáne ınfraqurylymdyq damý mınıstrliginiń Azamattyq avıatsııa komıtetinde avıatsııalyq tasymaldar jáne halyqaralyq áýe qatynasyn retteý basqarmasynyń basshysy laýazymynda boldy.
Qazaqstan Respýblıkasy Prezıdentiniń 2021 jylǵy 2 jeltoqsandaǵy Jarlyǵymen Qazaqstan Respýblıkasynyń Qurmet gramotasymen marapattalǵan.
Munan bólek, Memleket basshysynyń ókimimen Aqan Aqasuly Rahmetýllın Qazaqstan Respýblıkasy Syrtqy ister mınıstriniń birinshi orynbasary laýazymyna taǵaıyndaldy.
Aqan Aqasuly Rahmetýllın 1967 jyly 2 aqpanda Almatyda týǵan. 1991 jyly Almaty energetıkalyq ınstıtýtyn bitirdi. І synypty Tótenshe jáne Ókiletti Ýákil dıplomatııalyq dárejege ıe. Aǵylshyn jáne ýrdý tilderin erkin meńgergen. Óziniń dıplomatııalyq mansabyn 1993 jyly referent laýazymynan bastaǵan. Qazaqstannyń Pákistandaǵy, Aýstrııadaǵy elshilikterinde, Qazaqstannyń Nıý-Iorktegi BUU janyndaǵy Turaqty ókildiginde jumys istep, onda BUU Bas Assambleıasynyń Úshinshi komıtetiniń, BUU túrli organdaryna saılaýdyń máselelerin júrgizdi, sondaı-aq Qazaqstannyń Vena qalasyndaǵy EQYU janyndaǵy Turaqty ókildiginde qyzmet atqardy. Qazaqstannyń EQYU-ǵa tóraǵalyǵy kezinde Uıymnyń ekinshi ólsheminiń (ekologııa jáne ekonomıka máseleleri) jumysyn úılestirdi.
QR SІM-niń Almatydaǵy ókildiginiń keńesshisi bolyp, Qazaqstannyń halyqaralyq uıymdarmen yntymaqtastyq máselelerine jetekshilik etti. Ortalyq apparatta Kópjaqty yntymaqtastyq departamentin basqardy. 2019-2021 jyldary Qazaqstannyń Pákistandaǵy Elshisi, al 2021-2022 jyldary Syrtqy ister mınıstriniń orynbasary boldy.
2022 jyly QR Syrtqy ister mınıstriniń birinshi orynbasary laýazymynda qyzmet aqtardy. QR Syrtqy ister mınıstriniń birinshi orynbasary laýazymyna taǵaıyndalǵanǵa deıin 2022 jyldyń qazan aıynan bastap Qazaqstannyń Nıý-Iorktegi BUU janyndaǵy Turaqty ókili qyzmetin atqardy.
Al onyń ornyna Qaırat Ermekuly Omarov Qazaqstan Respýblıkasynyń Birikken Ulttar Uıymy janyndaǵy Turaqty ókili bolyp taǵaıyndaldy.
Qaırat Omarov 1963 jyly Ózbekstanda, Ferǵana qalasynda týǵan. Almaty shet tilderi pedagogıkalyq ınstıtýtyn bitirgen (1985). Ulybrıtanııa Syrtqy ister mınıstrliginde eńbek ótilinen ótken (1992).
Eńbek joly: Qazaqstan Ǵylym akademııasy Tarıh, etnografııa jáne arheologııa ınstıtýtynyń ǵylymı qyzmetkeri; Qazaqstan Jazýshylar odaǵy janyndaǵy Kórkem aýdarma boıynsha Bas redaktsııalyq alqasynda aǵylshyn tilinen aýdarmalardyń bas redaktory (1989-1991); Qazaqstan Respýblıkasy Syrtqy ister mınıstrliginiń ekinshi, birinshi hatshysy, Eýropa jáne Amerıka bóliminiń meńgerýshisi (1992-1994); Qazaqstan Respýblıkasy Syrtqy ister mınıstrliginiń basqarma bastyǵy, Eýropa departamenti dırektorynyń orynbasary (1996-1998); Qazaqstan Respýblıkasynyń AQSh-taǵy Elshiliginiń keńesshi-elshisi, Qazaqstan Respýblıkasy Syrtqy ister mınıstrliginiń aıryqsha tapsyrmalar jónindegi Elshisi (1998-2004); QR Prezıdenti Ákimshiliginiń Syrtqy saıasat ortalyǵynyń bas ınspektory (2004); QR-nyń Úndistan Respýblıkasyndaǵy Tótenshe jáne Ókiletti Elshisi (2004-2008); QR-nyń Shrı-Lanka Demokratııalyq Sotsıalıstik Respýblıkasyndaǵy Tótenshe jáne ókiletti Elshisi mindetin qosa atqarýshy (2008-2009); QR Syrtqy ister mınıstriniń orynbasary (2009-2013); 2013 jylǵy qańtardan bastap 2017 jyldyń qańtaryna deıin – Qazaqstan Respýblıkasynyń Amerıka Qurama Shtattaryndaǵy Tótenshe jáne Ókiletti Elshisi. 2017-2020 jyldary – Qazaqstannyń BUU janyndaǵy turaqty ókili.
Sonymen qatar ol Qazaqstan Respýblıkasynyń Avstrııa Respýblıkasyndaǵy Tótenshe jáne Ókiletti Elshisi (2020 jyldan bastap), Qazaqstan Respýblıkasynyń Slovenııa Respýblıkasyndaǵy Tótenshe jáne Ókiletti Elshisi qyzmetin qosa atqarýshy (2021 jyldan), Qazaqstan Respýblıkasynyń Vena qalasyndaǵy halyqaralyq uıymdary janyndaǵy turaqty ókili boldy. Jańa taǵaıyndaýǵa deıin elimizdiń Syrtqy ister mınıstriniń birinshi orynbasary qyzmetin atqardy.
Prezıdenti kelisimi negizinde Bas prokýrordyń buıryǵymen 3-synypty memlekettik ádilet keńesshisi Aıdos Serikhanuly Maılybaev Mańǵystaý oblysynyń prokýrory laýazymyna taǵaıyndaldy.
Aıdos Maılybaev eńbek jolyn 2001jyly Jambyl oblysy Taraz qalasy prokýrorynyń kómekshisi laýazymynan bastaǵan. Ár jyldary Almaty oblysy Jambyl jáne Panfılov aýdandarynyń prokýrory, Jambyl oblysy prokýrorynyń orynbasary, Aqtóbe oblysy prokýrorynyń birinshi orynbasary qyzmetterin atqarǵan. Jańa qyzmetke taǵaıyndalǵanǵa deıin 4 jyldan astam Aqmola oblysynyń prokýrory boldy.
Prokýratýra organdarynyń qurmetti qyzmetkeri Aıdos Maılybaev zańdylyq pen quqyqtyq tártipti nyǵaıtýǵa qosqan úlesi úshin «Jaýyngerlik erligi úshin» medalimen jáne 2-dárejeli «Aıbyn» ordenimen nagradtalǵan.
Prezıdent Ákimshiliginiń kelisimi boıynsha Qarjylyq monıtorıng agenttigi tóraǵasynyń buıryǵymen Baqytjan Abýlhaırov Soltústik Qazaqstan oblysy boıynsha Ekonomıkalyq tergep-tekserý departamentiniń basshysy qyzmetine taǵaıyndaldy.
Baqytjan Abýlhaırov Astana qalasynyń týmasy. Qarjy polıtsııasy akademııasynyń túlegi. 2007-2016 jyldar aralyǵynda qarjy polıtsııasy organynda jáne sybaılas jemqorlyqqa qarsy qyzmette túrli laýazymda eńbek etti. 2016 jyldan bastap ekonomıkalyq tergep-tekserý qyzmetinde jumys istep keledi. 2022 jyldan bastap osy taǵaıyndaýǵa deıin Shymkent qalasy boıynsha ekonomıkalyq tergep-tekserý departamenti basshysynyń orynbasary bolyp eńbek etti.
Ashat Hasenov «QazMunaıGaz» UK AQ basqarma tóraǵasynyń mindetin atqarady.
Ashat Hasenov Qanysh Sátbaev atyndaǵy Qazaq ulttyq tehnıkalyq ýnıversıtetin «Munaı jáne gaz uńǵymalaryn burǵylaý» mamandyǵy boıynsha, sondaı-aq Halyqaralyq bıznes ýnıversıtetin «Menedjment» mamandyǵy boıynsha támamdaǵan.
Eńbek jolyn 2005 jyly «Torǵaı Petroleým» AQ Munaı jáne gaz óndirý tsehynyń 3-razrıadty operatory qyzmetinen bastaǵan. 2006-2010 jyldary «Munaı jáne gaz ónerkásibiniń bas dıspetcherlik basqarmasy» AQ-da jumys istedi, onda tehnıkalyq retteý basqarmasynyń jetekshi mamanynan bastap vıtse-prezıdenttiń basqarýshylyq laýazymyna deıin qyzmet atqardy. Ár jyldary memlekettik organdarda jaýapty qyzmette boldy. 2022 jyldyń qańtarynan 2024 jyldyń mamyryna deıin QR Energetıka vıtse-mınıstri qyzmetin atqaryp keldi.
