Qazaqstanda ótken aptada 7 adam sýǵa ketken
NUR-SULTAN. QazAqparat –Ótken aptada ǵana elimizdiń ár óńirinde 7 adam sýǵa ketken, dep habarlaıdy QazAqparat Tótenshe jaǵdaı komıtettiń baspasóz qyzmetine silteme jasap.
15 maýsym kúni Qaraǵandy oblysynda qutqarýshylar úsh adamdy bir ólimnen aman alyp qalypty. Álgi kisiler qaıyqqa minip, jaǵadan edáýir alystap ketse kerek. Sonymen birge Qaraǵandy oblysynyń Abaı aýdany Sherýbaı-Nura sý qoımasynda qutqarýshylar 2 adamdy, Sasyqkól kólinde 1 adamdy qutqarǵan.
«Ótken aptada elimizdegi sý qoımalaryna sýǵa túsýge barǵan 7 adam mert boldy. Onyń biri – bala. Naqtyraq aıtqanda 14 maýsymda ShQO Borodýlıha aýdany Jańa Úlbi aýylynan bir shaqyrym jerdegi qoldan jasalǵan sý qoımasynda 1977 jylǵy azamat tunshyǵyp jan tapsyrdy. Dál sol kúni Qyzylorda qalasynyń Araı shaǵyn aýdanynda Syrdarııa ózeninde de 1975 jylǵy azamat kóz jumdy. 13 maýsymda ShQO Ulan aýdany Gagarın aýylynda Dubyǵaly kólinde úlkenderdiń qaraýynsyz qalǵan 2012 jylǵy bala sýǵa batyp ketken. Dál sol kúni Pavlodardaǵy Ýsolka ózeninde 2002 jylǵy jas jigittiń ajaly sýdan keldi. BQO Aqjaıyq aýdayn Bitleý aýylyndaǵy Taıpaq sý qoımasynan qutqarýshylar 1984 jylǵy jigittiń denesin alyp shyqty. Ol jigit 12 maýsymda ruqsat etilmegen orynda sýǵa túsip, joǵalyp ketken bolatyn», - delingen komıtet habarlamasynda.
Dál osyndaı oqıǵa SQO-da da tirkelipti. Aıyrtaý aýdanynda qutqarýshylar 1994 jylǵy jigittiń denesin alyp shyqqan. Ol da 12 maýsymda ruqsat etilmegen orynda sýǵa túsip, aǵyp ketken.
QR ІІM Tótenshe jaǵdaılar komıteti sýǵa túsken kezde halyqty saq bolýǵa shaqyrady.
