Qazaqstanda ótken 6 aıda ana ólimi 15,1 paıyzǵa tómendedi - Densaýlyq saqtaý mınıstrligi
ASTANA. 11 shilde. QazAqparat - QR Densaýlyq saqtaý mınıstrliginiń Medıtsınalyq jáne farmatsevtıkalyq qyzmetti qadaǵalaý komıtetiniń habarlaýynsha, respýblıkada 2013 jylǵy 6 aıda ana ólim-jitimi kórsetkishi ótken jyldyń sáıkes kezeńimen salystyrǵanda 15,1% tómendegeni baıqalady. Bul týraly vedomstvonyń baspasóz qyzmetinen habarlandy.
Atalǵan merzim ishinde ana ólim-jitimi basqa óńirlerge qaraǵanda Ońtústik Qazaqstan, Jambyl oblystarynda jáne Almaty qalasynda kóbirek oryn alǵan. Barlyq jaǵdaılar boıynsha Medıtsınalyq jáne farmatsevtıkalyq qyzmetti qadaǵalaý komıteti táýelsiz sarapshylardy, respýblıkalyq ǵylymı ortalyqtardyń mamandaryn tarta otyryp, saraptama júrgizdi. Ońtústik óńirlerdegi jaǵdaıdy eskere otyryp, Densaýlyq saqtaý mınıstrligi eki márte ana ólim-jitimin tómendetý boıynsha shuǵyl sharalar qabyldaý jóninde shtab quryp, bosaný qyzmetin tıisti deńgeıde uıymdastyrmaǵany úshin medıtsınalyq uıymdardyń jetekshilerine qatysty qatań sharalar qabyldady.
Medıtsınalyq jáne farmatsevtıkalyq qyzmetti qadaǵalaý komıteti barlyq oqıǵalar boıynsha medıtsınalyq qyzmetkerler men emdeý mekemeleri basshylarynyń is-áreketine quqyqtyq baǵa berý úshin tekserý materıaldaryn quqyq qorǵaý jáne prokýratýra organdaryna joldady.
Jalpy, 2013 jyldyń 6 aıynda tekserý nátıjeleri, azamattardyń aryz-shaǵymdary boıynsha medıtsınalyq qyzmetkerler men emdeý mekemeleriniń basshylaryna qatysty 67 tártiptik shara qoldanylyp, onyń ishinde 19 qyzmetker jumystan shyǵaryldy.
