Qazaqstanda ótken 6 aıda 7 mln. 204 myń tonna munaı óńdeldi

ASTANA. QazAqparat - 2014 jyldyń qańtar-maýsym aılarynda Qazaqstannyń munaı óndirý kompanııalarmen jáne úsh Munaı óńdeý zaýyttarymen 7 mln. 204,2 myń tonna munaı óńdeldi.

Atalǵan kórsetkish byltyrǵy jyldyń osy kezeńimen salystyrǵanda 100,6 paıyzdy quraıdy. Bundaı aqparatty Munaı jáne gaz mınıstrliginiń resmı saıty taratyp otyr.

Atap aıtqanda, qańtar-maýsym aralyǵynda Qazaqstannyń Munaı óńdeý zaýyttary óndirgen benzın kólemi - 1 471,9 myń tonna (2013 jylmen salystyrǵanda 119,6 %), áýe kerosıni - 201,5 myń tonna (2013 jylǵa 111,4 %), dızel otyny - 2 008,5 myń tonna (2013 jylǵa 99,3 %), mazýt - 1 637,9 myń tonnany (2013 jylǵa 87,4 %) quraǵan.

Sonymen qatar, aǵymdaǵy jyldyń 1 maýsymyndaǵy jaǵdaıǵa sáıkes, jyl basynan beri elimizde munaı óndirý kólemi 33 507 myń tonnany qurady. Bul kórsetkish bıylǵy jyldyń basyndaǵy josparǵa 100,9 paıyzdy, al 2013 jyldyń osy kezeńimen salystyrǵanda 99,5 paıyzdy quraıdy.