Qazaqstanda otyrǵyzylǵan aǵashtardyń tek jartysy ǵana jersinedi
ASTANA. KAZINFORM — Elde otyrǵyzylǵan kóshetterdiń ortasha jersiný deńgeıi shamamen 50%-dy quraıdy. Bul kórsetkish belgilengen 60%-dan joǵary normatıvten tómen, dep habarlaıdy Kazinform tilshisi.
Bul týraly QR Premer-mınıstriniń birinshi orynbasary Nurlybek Nálibaevtyń depýtattyq saýalǵa bergen jaýabynda aıtylǵan.
Úkimet málimetinshe, 2021–2025 jyldary elimizdiń memlekettik orman qorynda shamamen 1,65 mlrd kóshet otyrǵyzylǵan. Alaıda sońǵy kúzgi túgendeý nátıjeleri olardyń orta eseppen tek jartysy ǵana jersingenin kórsetti.
Otyrǵyzý materıaldarynyń negizgi bóligin jalpy aýmaǵy 2,7 myń gektarǵa jýyq memlekettik orman kóshet ósirý sharýashylyqtary qamtamasyz etedi. Olar jyl saıyn 160 mln-ǵa deıin kóshet ósiredi.
Sońǵy bes jylda Qazaqstannyń eldi mekenderinde shamamen 18,1 mln aǵash otyrǵyzyldy.
Kógaldandyrý sapasyn arttyrý jáne otyrǵyzý materıaldaryn óndiretin otandyq kásiporyndardy qoldaý maqsatynda birqatar jańa sharalar ázirlenip jatyr. Atap aıtqanda, sándik kóshet ósirý sharýashylyǵyna arnalǵan jeke EQJJ (Ekonomıkalyq qyzmet túrleriniń jalpy jikteýishi) kodyn engizý máselesi qarastyrylyp jatyr. Bul jabyq tamyr júıesi bar sándik ósimdikter ósiretin kásiporyndardy jeke sanat retinde aıqyndaýǵa múmkindik beredi.
Sonymen qatar sapaly otyrǵyzý materıaldaryn kúmándi ónimderden ajyratý úshin EAEO SEQ TN kodtaryn naqtylaý josparlanyp otyr.
Ekologııa jáne tabıǵı resýrstar mınıstrligi Ónerkásip jáne qurylys mınıstrligimen birlesip, jetekshi otandyq kóshet ósirý sharýashylyqtaryn, onyń ishinde «Qazaqstan ormany» JShS-in Qazaqstandyq taýar óndirýshiler tizilimine engizý múmkindigin qarastyryp jatyr.
Budan bólek, sándik kóshet ósirý sharýashylyqtary men dendrologııalyq saraptama júrgizetin uıymdardy akkredıtteý nemese lıtsenzııalaý tetikterin engizý máselesi de zerdelenip jatyr.
Úkimet jasyl qordy tsıfrlandyrýǵa erekshe kóńil bólip otyr. Qazirgi ýaqytta Qazaqstanda 8 mıllıonnan astam qalalyq aǵash tsıfrlandyrylǵan. Astana, Almaty, Qaraǵandy, Mańǵystaý, Pavlodar oblystary jáne birqatar óńirlerde jasyl jelekterdiń ınteraktıvti kartalary men tizilimderi pılottyq rejımde jumys isteıdi.
Orta merzimdi perspektıvada barlyq oblys ortalyqtarynda aǵashtardy tsıfrlyq esepke alý jumystary aıaqtalyp, ár aǵashqa QR-kod berilip, olardyń jaǵdaıy biryńǵaı derekter bazasynda tirkelmek.
Sondaı-aq Qazaqstan Ǵarysh Sapary ulttyq kompanııasymen birlesip memlekettik orman qoryndaǵy orman ósirý jumystarynyń ınteraktıvti kartasy ázirlendi. Qazir oǵan eldi mekenderdegi aǵash otyrǵyzý týraly derekterdi engizý máselesi pysyqtalyp jatyr.
Eske sala keteıik, buǵan deıin Almatyda 2026 jyly egiletin aǵash pen buta sany artqany belgili boldy.
