Qazaqstanda ótetin halyqaralyq AI olımpıadasynyń medali tanystyryldy
ASTANA. KAZINFORM — Qazaqstannyń sporttyq baǵdarlamalaý federatsııasy IOAI 2026 halyqaralyq olımpıadasynyń resmı medalin kópshilikke kórsetti.
2026 jylǵy 2–8 tamyz aralyǵynda Astanada ótetin Jasandy ıntellekt boıynsha 3-shi halyqaralyq olımpıadanyń (International Olympiad in Artificial Intelligence — IOAI 2026) resmı medalin tanystyryldy.
Medal dızaıny halyqaralyq olımpıadanyń jahandyq mártebesi men Qazaqstannyń qabyldaýshy el retindegi rólin úılestire otyryp, jasandy ıntellekt salasyndaǵy jas talanttardy qoldaý, ǵylymı yntymaqtastyqty damytý jáne tehnologııalyq progresti dáripteý ıdeıalaryn beıneleıdi.
Medaldiń aldyńǵy betinde (aversinde) IOAI 2026 resmı logotıpi ornalasqan. Ol jasandy ıntellekt baǵytynda bilim alyp, ǵylymı izdenispen aınalysyp júrgen daryndy jastardyń jahandyq qaýymdastyǵyn jınaıtyn dodany beıneleıdi. Sheńber boıymen «3rd International Olympiad in Artificial Intelligence» degen jazý, tómengi bóliginde «Astana 2026» ataýy jáne Qazaqstannyń ulttyq mádenı murasyn aıshyqtaıtyn dástúrli qazaq oıý-órnegi beınelengen.
Medaldiń syrtqy beti (reversi) IOAI 2026 olımpıadasyn uıymdastyrýshy Qazaqstannyń sporttyq baǵdarlamalaý federatsııasyna arnalǵan. Onyń ortasynda Astanadaǵy Halyqaralyq jasandy ıntellekt ortalyǵynyń shtab-páteri — Alem.ai sferasy beınelengen. Elordanyń zamanaýı sáýlet nyshandarynyń birine aınalǵan bul nysan Qazaqstannyń jasandy ıntellekt, tsıfrlyq tehnologııalar jáne ınnovatsııalar baǵytyndaǵy strategııalyq damý baǵytyn aıqyn kórsetedi. Sheńber boıynda olımpıadanyń tolyq ataýy, al tómengi bóliginde «Astana, Kazakhstan» degen jazý ornalasqan.
— Medal tujyrymdamasy ózara sabaqtas eki ıdeıaǵa negizdelgen. Aldyńǵy beti IOAI-dyń halyqaralyq sıpatyn, ıaǵnı álemniń túkpir-túkpirinen kelgen jasandy ıntellekt salasyndaǵy eń daryndy oqýshylardy biriktiretin bilim saıysyn bildiredi. Al syrtqy beti Qazaqstannyń osy aýqymdy halyqaralyq jobany ótkizý arqyly jahandyq AI ekojúıesiniń damýyna qosyp otyrǵan úlesin jáne eldiń óńirdegi tehnologııalyq ınnovatsııalar ortalyǵy retinde qalyptasyp kele jatqanyn aıshyqtaıdy, — deıdi uıymdastyrýshylar.
Osylaısha medaldiń eki beti birtutas mazmundyq ıdeıany qalyptastyrady: álemdik deńgeıdegi olımpıada jasandy ıntellekt tehnologııalaryn damytýǵa júıeli túrde ınvestıtsııa salyp, jas talanttardy qoldaıtyn jáne ınnovatsııalyq bolashaqty birge qalyptastyryp jatqan elde ótedi.
Aıta keteıik, 2026 jyly Astana álemniń 110 elden keletin 500 shaqty oqýshylardy qabyldaıdy. Bir apta boıy olar mashınalyq oqytý, kompıýterlik kórý, tabıǵı tildi óńdeý jáne jasandy ıntellekttiń ózge de baǵyttary boıynsha bilimderi men tájirıbelerin synǵa salady. IOAI 2026 medali osy joǵary jetistiktiń sımvolyna aınalyp, álemniń úzdik jas AI zertteýshilerine tabystalatyn bolady.
Buǵan deıin qazaqstandyq oqýshylar halyqaralyq jasandy ıntellekt olımpıadasynda 4 júlde alǵanyn jazdyq.
