Qazaqstanda ótetin Armııa oıyndarynyń baıqaýlaryna 17 el qatysady

ASTANA. QazAqparat - 2016 jyldyń 30-shy shildesi men 13-shi tamyzy aralyǵynda elimizde Halyqaralyq armııa oıyndary ótedi, dep habarlaıdy QR Qorǵanys mınıstrliginiń baspasóz qyzmeti.

Atalǵan oıyndardyń negizinde 23 halyqaralyq baıqaý ótkizý qarastyrylýda, olardyń ishinde - «Artıllerııalyq oq atý sheberi» jáne «Mergen shebi» baıqaýlary alǵash ret Qazaqstan Respýblıkasyna qarasty polıgondardyń aýmaǵynda ótkiziletin bolady.

Qazaqstan aýmaǵynda ótkiziletin «Artıllerııalyq oq atý sheberi» baıqaýyna qazirdiń ózinde 6 eldiń áskerı qyzmetshileri qatysatyny málim boldy. Olar - Angola, Venesýella, Qazaqstan, Qyrǵyz Respýblıkasy, Qytaı, Reseı.

Al «Mergen shebi» baıqaýyna 11 eldiń armııasy - Belarýs, Venesýella, Zımbabve, Úndistan, Iran, Qazaqstan, Qyrǵyz Respýblıkasy, Qytaı, Mońǵolııa, Reseı jáne OAR qatysady.

Atalǵan baıqaýlarǵa 8 el baqylaýshylaryn jiberýge daıyn. Olar: Avstrııa, Aljır, Germanııa, Izraıl, Kýba, Namıbııa, Mıanma Odaǵy, Saýd Arabııasy. Esterińizge sala ketsek, 2015 jyldyń tamyz aıynda Armııa halyqaralyq oıyndary alǵash ret Reseıde ótkizilgen bolatyn. Oǵan barlyǵy 17 elden 56 komanda qatysty. Bul oıyndar boıynsha 13 baıqaý 11 polıgonda ótkizilip, áskerı qyzmetshilerdiń dalalyq (áýe, teńiz) mashyqtary synaldy. Alǵashqy saıystyń qorytyndysy kórsetkendeı, baıqaýlar áskerı qyzmetshiler men ekıpajdardyń kásibı daıarlyq deńgeıin, olardyń sheberligi men jınaqylyǵyn arttyrýǵa, qatysýshy elderdiń Qarýly Kúshteri arasyndaǵy halyqaralyq yntymaqtastyqty nyǵaıtýǵa yqpal etti.