Qazaqstanda ótetin 7-nshi qysqy Azııa oıyndarynyń Alaý estafetasy úshin barlyǵy 100 alaýquty ázirlendi
ASTANA. 9 Qarasha. QazAqparat /Gúlmıra Álıakparova/ - Qazaqstanda ótetin 7-nshi qysqy Azııa oıyndarynyń Alaý estafetasy úshin barlyǵy 100 alaý alyp júretin quty ázirlendi. Bul týraly QazAqparat tilshisine bergen suhbatynda atalmysh oıyndardy jáne Alaý estafetasyn ótkizý jónindegi dırektsııa basshysynyń orynbasary Sársen Quranbek málim etti.
S.Quranbektiń aıtýynsha, ár alaýqutynyń baǵasy 1 myń AQSh dollary shamasynda. «Biraq, ókinishke qaraı», - deıdi uıymdastyrýshylar, árbir alaýgerge olardy estelikke qaldyrý múmkin bolmaıdy. Tek estafeta ótetin ár óńirge bir danadan qaldyrylady. Qalǵandary Azııa Olımpıadalyq keńesiniń músheleri men basqa da qurmetti qonaqtarǵa syıǵa tartylady.
Búginde Qytaıdan jeke-jeke bólshektelip jetkizilgen alaýquty tolyǵymen jınalyp bitti. Ár fakeldiń tómengi jaǵynda óziniń rettik nómiri bar. Qazir alaýqutylary Almaty mańynda synaqtan ótip jatyr. Uıymdastyrýshylar bul synaqtar barysynda birneshe alaýquty jaramsyz bolyp shyǵýy múmkindigin joqqa shyǵarmaıdy. Al aldaǵy 17-18 qarasha kúnderi Astana qalalyq dırektsııasy oblys ákimderiniń basqarýymen qurylǵan shtabtardyń múshelerin elordada jınap, synamalyq, ári kórsetilim estafetasyn ótkizýdi kózdep otyr.
Buǵan deıin habarlaǵanymyzdaı, 7-nshi qysqy Azııa oıyndary Alaý estafetasynyń fakeli 11 qańtar kúni Azııa Olımpıadalyq keńesiniń shtab-páteri ornalasqan Ál-Kýáıt qalasynda tutandyrylyp, Oıyndardy uıymdastyrýshy Qazaqstan ókilderine tapsyrylady. 12 qańtar kúni Alaý ushaqpen Almaty qalasyna jetkiziledi. Osydan bastap onyń Qazaqstannyń óńirleri boıynsha saıahaty bastalady. Almatydan keıin alaýquty Taraz (13 qańtar), Shymkent (14 qańtar), Qyzylorda (15 qańtar), Aqtaý (16 qańtar), Atyraý (17 qańtar), Oral (18 qańtar), Aqtóbe (19 qańtar), Qostanaı (20 qańtar), Petropavl (21 qańtar), Kókshetaý (22-23 qańtar), Pavlodar (24 qańtar), Óskemen (25-26 qańtar), Taldyqorǵan (27 qańtar), Qaraǵandyǵa (28-29 qańtar) jáne aq Azıada saltanatty ashylatyn kúni Astanaǵa (30 qańtar) jetkiziledi.
