Qazaqstanda otbasylyq týrızmdi damytý qajet - Kazakh Tourism
ASTANA. QazAqparat - «Kazakh Tourism» ulttyq kompanııasy otbasylyq týrızm jelisin qurýdy usyndy, dep habarlaıdy QazAqparat tilshisi.
"Jer aýmaǵy boıynsha Qazaqstan álemde 9-oryndy alady. Respýblıkanyń shyǵysyndaǵy balalar batysta, ońtústiktegi balalar - soltústikte ne bolyp jatqanynan beıhabar. (...) Sol sebepti, balalar men jasóspirimder týrızmin, otbasylyq týrızm, kempıngter men karavanıngter jelisin qurý qajet", - dedi «Kazakh Tourism» UK» AQ basqarma tóraǵasynyń orynbasary Tımýr Dúısenǵalıev «Balalar men jasóspirimder týrızmin damytýdyń jańa múmkindikteri» otyrysynda.
Ulttyq kompanııa ókiliniń aıtýynsha, osylaısha adamdar mobıldi bolýdy úırenedi.
"Biz poıyz ben ushaqtan derbes bola alamyz, sómkemizdi asynyp, taý men tasty kezip ketýge bolady. Qolaısyz aýa raıynda qaýipsiz jerge toqtaý úshin kempıngter men lagerlerdi kóbeıtý kerek. Bul bastama keleshigi mol ulttyq jobalardyń biri bolar edi", - dep óz sózin tolyqtyrdy ol.
T. Dúısenǵalıevtiń pikirinshe, kez kelgen damyǵan eldegi aqsha aǵynynyń 80%-in ishki týrızm beredi. Sondaı-aq, ol balalar men jasóspirimder týrızminiń qaıtymy mol týrızm ekenin, ata-analardyń bala qyzyǵýshylyǵy úshin eshteńeni aıamaıtynyn atap ótti.
QR Bilim jáne ǵylym mınıstrligi keltirgen derekterge sáıkes, mektep oqýshylarynyń 2,6% ǵana - 3 mıllıon balanyń 80 myńy ǵana týrıstik-ólketaný baǵytyndaǵy qosymsha úıirmege barady.
