Qazaqstanda otbasynyń shyrqyn buzyp, qamaýǵa alynǵandardyń sany artqan
ASTANA. KAZINFORM – Qazaqstanda byltyrdan beri otbasynda zorlyq-zombylyq kórsetý faktileri azaıyp, kerisinshe jaýap tartylǵandardyń sany kóbeıgen. Oǵan ne sebep? Saýaldyń jaýabyn Іshki ister mınıstrliginen suraǵan edik.
«Qazir qoǵamda otbasyndaǵy zorlyq-zombylyqqa tózbeýshilik jáne ol úshin jazanyń bultartpastyǵy protsesi qalyptasyp keledi, jábir kórýshiler muńyn ashyq aıtatyn boldy. Jalpy, turmystyq qatynas erli-zaıyptydan basqalarǵa da qatysty. Olardyń qatarynda ajyrasqandar, buryn birge turǵandar, ortaq balasy barlar, otbasynyń barlyq múshesi jáne zańdy nekesiz birge turatyndar bar. Atalǵan azamattardyń quqyǵy men jaýapkershiligi turmystyq, otbasylyq zańda taıǵa tańba basqandaı jazylǵan», - delingen mınıstrliktiń Kazinform agenttigi joldaǵan resmı saýal jaýabynda.
Vedomstvonyń málimetinshe, endi tek kúıeýinen zábir kórgen áıelder ǵana emes, otbasynyń kez kelgen múshesi qurban nemese agressor bolady.
Sondaı-aq, saýalda turmystyq jábir kórgeni týraly er azamattardan shaǵym túsirý jaǵdaıy tirkeldi me? dep suraǵan edik.
«Іshki ister organdarynda tirkelgen otbasylyq-turmystyq zorlyq-zombylyq faktileriniń 80% boıynsha jábirlenýshi – áıelder», - degen jaýap aldyq.
Jalpy Іshki ister mınıstrligi otbasylyq zorlyq-zombylyq faktileriniń azaıǵanyn al jazanyń qataıǵanyn aıtyp otyr.
Óıtkeni, 2023 jylǵy 1 shildede Qazaqstan Respýblıkasynyń Ákimshilik quqyq buzýshylyq týraly kodeksine túzetýler engizildi.
«Ótken jyldyń ekinshi jartysynan bastap polıtsııa qyzmetkerleri turmystyq zorlyq-zombylyq jasaý faktisi boıynsha ákimshilik is qozǵaýdy óz qolyna aldy. Hattamany toltyrý úshin kýágerlerdiń, kórshilerdiń aıǵaqtary, beınebaqylaý kameralary men vıdeotirkegish jazbalary jetkilikti», - delingen habarlamada.
Alaıda sońǵy sheshimdi sot qabyldaıdy eken. Aıtpaqshy, 2023 jylǵy 1 shildege deıin otbasylyq zorlyq-zombylyq týraly polıtsııaǵa túsken shaqyrtýlardyń 60% asa jaıt boıynsha shara qabyldaý múmkin bolmaǵan, oǵan sebep, jábirlenýshiler aryz jazýdan bas tartqan.
Endi ІІM usynǵan statıstıkany keltirsek, Ákimshilik quqyq buzýshylyq kodeksine túzetýler engizilgennen keıin (2023 jylǵy 1 shilde) polıtsııaǵa turmystyq zorlyq-zombylyq týraly 48 622 habarlama túsip, olardyń 98% ákimshilik hattama toltyrylǵan.
Ótken jyldyń sońǵy 6 aıynda (shilde-jeltoqsan) zorlyq jasaǵany úshin jaýapkershilikke tartylǵandardyń sany ósken. Naqty aıtqanda, 2023 jyldyń 1-shi jartysynda (qańtar-maýsym) 17 myń otbasynyń shyrqyn buzǵan adam jaýapkershilikke tartylsa, jyldyń ekinshi jartysynda olardyń sany 44 973 adamǵa jetipti. Sonymen qatar qamaýǵa alynǵandardyń sany da eki esep ósip otyr.
Aıta keteıik, ótken jyly Іshki ister organdaryna otbasynda zorlyq-zombylyq kórý boıynsha 99 026 fakti tirkelgen.
Tilge tıek etsek, sońǵy ýaqytta turmystyq zorlyq-zombylyq problemalary qoǵamda jıi qozǵalyp, jábirlenýshiler kórgen azabyn ashyq aıta bastady.
Eske salaıyq, Qazaqstannyń BAÁ-degi elshiliktiń keńesshisi Sáken Mamash áıeline únemi kúsh kórsetetini, tipti jubaıynyń ápkesine de qol kótergeni týraly aqparat taraǵan edi.
Atalǵan fakti boıynsha qylmystyq is qozǵaldy.
Sondaı-aq, Atyraý oblysynda aýdan ákiminiń áıeli kúıeýinen zábir kórgenin aıtty.
Áıeldiń aıtýynsha, kúıeýi oǵan birneshe ret qol kótergen. Zábir kórgen áıeldiń vıdeosy áleýmettik jelide tarady.
Odan bólek, Almatyda lıftiniń aldynda áıeldi aıaýsyz uryp-soqqan er adamnyń ústinen qylmystyq is qozǵaldy.
Taǵy bir jaıt, Semeı qalasynda boldy, súıiktisin kólikpen taptap óltirgen kúdiktiniń isi sotqa jiberildi.
20 mamyrda habarlaǵanymyzdaı, áleýmettik jelide kóshede beımálim er adamnyń kóliktiń janynda áıeldi uryp jatqany taspalanǵan vıdeo tarady.
Vıdeodan erkektiń áıeldi shashynan súırep kólikke qınap mingizbek bolǵan sátin baıqaýǵa bolady. Bolmaǵan soń áıeldi uryp-soǵyp, kólikke minip ketip qalady. Keıin anyqtalǵandaı, oqıǵa Taraz qalasynda bolǵan.
