Qazaqstanda Otbasyn qoldaý ortalyqtarynyń sany úsh ese artty
ASTANA. KAZINFORM — Jyl basynan beri bul ortalyqtarǵa 100 myńnan astam adam júgingen, al 5 myńnan astam otbasyǵa jan-jaqty qoldaý kórsetilgen, dep habarlaıdy Mádenıet jáne aqparat mınıstrligi.
Mınıstrlik 2025 jyldyń birinshi jartyjyldyq boıynsha qorytyndy jasap, genderlik saıasat pen otbasyn qoldaý salasyndaǵy negizgi bastamalardy usyndy.
Vedomstvo málimetinshe, Qazaqstan ulttyq qundylyqtardy saqtaı otyryp jáne halyqaralyq standarttardy eskerip, bul baǵyt boıynsha júıeli jumystardy jalǵastyryp keledi.
2025 jyldyń aqpanynda elimizge «BUU-Áıelder» qurylymynyń Eýropa jáne Ortalyq Azııa óńiri boıynsha óńirlik dırektory Belen Sans Lıýke jumys saparymen keldi. Sapar aıasynda Beıjiń deklaratsııasy men is-qımyl platformasynyń 30 jyldyǵy aıasynda jáne Turaqty damýdyń 5-maqsaty – genderlik teńdikti qamtamasyz etý sheńberinde Ortalyq Azııanyń bolashaǵyna arnalǵan joǵary deńgeıdegi óńirlik kezdesý ótti.
Sonymen qatar, elimizde Respýblıkalyq reprodýktıvti densaýlyq aptalyǵy uıymdastyryldy. Osy ýaqyt aralyǵynda 20 myńnan astam is-shara ótip, oǵan 500 myńǵa jýyq adamnyń qatysty.
2024 jyly Áıelder quqyǵy men balalardyń qaýipsizdigin qamtamasyz etý máseleleri boıynsha zań kúshine endi. Bul shara otbasylyq saıasatty damytý úshin mańyzdy qadam boldy. Atalǵan zań aıasynda Otbasyn qoldaý ortalyqtarynyń jumysy qaıta qaralyp, olar biryńǵaı úlgi boıynsha jumys isteı bastady. Ortalyqtar sany 33-ten 124-ke deıin úsh ese artty. Jyl basynan beri bul ortalyqtarǵa 100 myńnan astam adam júgingen, al 5 myńnan astam otbasyǵa jan-jaqty qoldaý kórsetilgen.
Astana, Shymkent, Túrkistan, Qyzylorda, Jambyl, Mańǵystaý, Batys Qazaqstan jáne Soltústik Qazaqstan oblystarynda OQO-lardyń jumys protsesterin tsıfrlandyrý engizildi. Jaqyn arada «Ata-analar akademııasy» – Ata-ana.kz onlaın platformasy iske qosylady.
Otbasydaǵy áke men ananyń rólin arttyrý jumystary jalǵasyp keledi. Analar kúnine oraı elimizdiń barlyq óńirinde otbasyn nyǵaıtýǵa jáne áıelderdiń qoǵamdaǵy rólin aıqyndaýǵa baǵyttalǵan myńnan astam is-shara ótti. Ákeler kúni qarsańynda Astanada «Áke. Otbasy. Qoǵam» atty X Respýblıkalyq ákeler forýmy ótti. Oǵan belsendi ata-analar, sarapshylar jáne qoǵam ókilderi qatysty.
Qazaqstandyq qoǵamdyq damý ınstıtýtynyń janyndaǵy otbasylyq jáne genderlik saıasat jónindegi zertteý ortalyǵy óz jumysyn jalǵastyryp jatyr. Atap aıtsaq, turmystyq zorlyq-zombylyqtyń aldyn alý boıynsha Ulttyq esep daıyndaý, qazaqstandyq qoǵamdaǵy genderlik stereotıpterdi zertteý, sondaı-aq Aqparat jáne qoǵamdyq damý komıtetiniń saıtynda «Genderlik muqtajdyq pen qajettilikter kartasy» arnaıy bólimin ázirleý sekildi jumystar júrgiziledi.
Mınıstrlik atap ótkendeı, bul qadamdar Qazaqstannyń árbir azamaty teń quqyq pen múmkindikterge ıe bolatyn ádiletti ári qaýipsiz qoǵam qurýǵa degen umtylysyn aıqyn kórsetedi.
Buǵan deıin Aqtóbede ákim men muǵalimder kópbalaly otbasylardy shaqyryp jatqany aıtyldy. Kópbalaly otbasylar kóship barsa turǵyn úı alýǵa, jumysqa ornalasýǵa járdem beredi.